Ndoshta e kishte parashikuar, por të paktën e kishte paralajmëruar që për shkak të një tërheqje në bërryl, shkaktuar gjatë Kampionatit Kombëtar të të rriturve, Erkand Qerimaj nuk mund të ishte në maksimumin e tij. Është i pesti në shkëputje, teksa ka ngritur suksesshëm 156 kg dhe 158 kg. Por më pas nuk ka mundur dot ta ngrejë 160 kg.

Në shtytje, teksa nuk ka realizuar asnjë nga provat e tij, 191, 192, 193 kg, nuk është klasifikuar dhe për rrjedhojë nuk ka pasur të drejtën e klasifikimit as në dygarësh. Edhe duke qenë me statutin e Kampionit të Evropës, në një farë mënyre nuk ishte kjo gara që pritej prej Erkand Qerimajt.

Për të mos thënë që të gjithë e prisnin një dyluftim miqësor mes tij dhe Godellit. Por dëmtimi duket se është bërë pengesë që Qerimaj të mos japë maksimumin e tij në këtë garë. Në një reagim të tijin në rrjetin social “Facebook”, menjëherë pas garës, Erkand Qerimaj do të deklaronte: “Më vjen keq që gara ime nuk shkoi mirë”.

“Për shkak të dëmtimit në bërryl, ndërsa koha e shkurtër e përgatitjes për Botërorin, që ishte vetëm 3 javë, nuk dhashë maksimumin, – ka vijuar ai. – Jo vetëm kaq, por gjatë garës kam pasur dhe një bllokim të mesit, që nuk më lejoi të vazhdoja normalisht. Desha t’i jepja urimet e mia Danielin për rezultatin e lartë dhe për titullin Kampion Bote”.