Një tjetër zë kundër presidentit aktual të Federatës Shqiptare të Peshëngritjes, Elez Gjoza, është dhe Endri Haxhihyseni. Ai në një postim në profilin e tij në rrjetin social, “Facebook”, jo vetëm që ka dalë në krah të shokëve, por dhe i ka kujtuar presidentit aktual atë që kishte thënë më 16 nëntor 2012, atëherë kur u zgjodh për herë të parë presidenti i Federatës Shqiptare të Peshëngritjes. Pra nëse do të ishte një rast i vetëm dopingut do të jepte dorëheqjen, gjë që sipas Haxhihysenit nuk e bëri.
Jo vetëm kaq, por Haxhihyseni është dëshmitar i saj që ka ndodhur me grumbullimin e kombëtares më 2014-ën në Greqi, ndërsa u është thënë që do të hani e do të pini atë që do të thotë Luan Shabani. Për transparencë AlbanianSport.com po e jep të plotë statusin e tij në facebook. “Një president që erdhi me premtime të mëdha, mori shumë përsipër dhe gjëja e vetme që beri është që përjashtoi dhe dogji sportistët nga ata më elitarët”, – shkruan ish-peshëngritësi.
“Ka thënë: Nëse kapet qoftë edhe një sportist me doping unë do të jap dorëheqje, gjë që nuk i është afruar e jo më ta bëjë, – vijon Haxhihyseni. – Si ka mundësi që sportisti që kapet me doping dënohet dhe trajneri i tij shpërblehet? Një pyetje kam, merrni çdo sportist, që nga kampioni i botës, Daniel Godelli, që nga Krenar Shoraj, Sopot Sula, Erkand Qerimaj dhe deri tek më të rinjtë, si Kristi Ramadani, e të gjithë mburren me medalje.”
“Jam ish-sportist, jam ish-“kampion” dhe kam qenë e jam në krah të sportistëve, – ka vijuar ai. – Nuk e mbështes këtë Federatë ku Sekretar bëhet pjesë dhe një kushëriri imi, pasi është një gjë e gabuar. Ish-Sekretari i Përgjithshëm (Muharrem Berisha), që e vuri në këtë detyrë presidenti i sotëm i peshëngritjes, u largua nga detyra se pa që nuk ndihmonte dot sportistët dhe u ndje fajtor për njeriun që kish sjellë në krye të kësaj Federate. Kur nuk ka besim një shok …!
“Unë kam qenë pjesë e ekipit kombëtar kur president erdhi në shtetin helen dhe na tha që “do të pini dhe të hani çdo gjë që ju jep Luan Shabani. Nëse ju thotë, mos hani bukë, ju nuk do hani pa lejen e tij.” Nëse do të isha unë sot president, duke ditur sakrificat e sportit tim, do të jepja dorëheqjen gjithnjë nëse do të doja më të mirën e sportit tim të bukur të peshëngritjes”, – përfundon Endri Haxhihyseni postimin në profilin e tij në rrjetin social, “Facebook”.
