ASNN – Peshëngritja pati një transformim të thellë gjatë vitit 2018 që lidhet me votimet e bëra në muajin prill për presidentin dhe më vonë për kryesinë e re. Zgjedhja e organeve të reja drejtuese u prit mirë dhe nga vetë komuniteti i shtangës, i cili shpreson të gjejë ritmin e kërkuar dhe rezultatet e dëshiruara nga të gjithë. Problemi i madh i peshëngritjes sot, njëjtë sikurse në shumë sporte individuale dhe sidomos ato të forcës, është pakësimi i numrit të sportistëve dhe sidomos pakësimi i numrit të sportistëve që kanë rezultate të larta, njohur si “elitarë”.
Disa federata, përfshi dhe atë të shtangës, shpesh ndajnë nga fondet e tyre një shumë parash për të stimuluar me shpërblime dhe pagesa modeste sportistët kryesorë, kampionë në Shqipëri, ose ata që vijnë me medalje nga veprimtaritë ndërkombëtare. Kuptohet, fondet që kanë federatat janë të limituara, sepse fondi “grant” që jepet nga shteti për federatat shumësportëshe është mjaft i ulët dhe nuk mjafton as për organizimin e të gjitha veprimtarive vjetore.
Në kuadër të peshëngritjes, drejtuesit e rinj të federatës janë përpjekur të inkurajojnë sportistët elitarë me një pagesë ekstra, shpesh me para nga xhepi, vetëm e vetëm që të ketë arsye që këta sportistë të ndihen në formë dhe të motivuar për garat e rëndësishme. Por edhe pse pagesat jepen, rezultatet mungojnë. Me përjashtim të Briken Caljes, kampion i trefishtë i Evropës dhe vendi i 6-të në botë, pozicione të cilat i vlerëson me shpërblim edhe VKM-ja e qeverisë për rezultatet e larta ndërkombëtare, të tjerët kanë dështuar.
Dhe këtu shigjetat shkojnë tek Erkand Qerimaj e Daniel Godelli, të cilët edhe në Botërorin e fundit nuk ishin në atë lartësi që kërkohej, ku njëri renditet i 23-ti në peshën 81 kg e tjetri nuk klasifikohet në dygarësh. Kanë nisur zërat kritikë, ku kërkohet që paratë që jepen për “elitarët” të ndahen me të rinjtë e talentuar që mund të jenë shpresë për të nesërmen. Edhe pse rezultatet nuk janë në nivelet e kërkuara, stimulimi financiar mund t’u japë shtysë shumë të rinjve të shtangës që të ushtrohen më shumë në stërvitje dhe të mbulojnë disa shpenzime që rëndojnë xhepat e familjes së tyre.
I këtij mendimi është edhe një prej trajnerëve me eksperiencë të shtangës, Hektor Shaqiri, i cili në një intervistë që ka dhënë pak ditë më parë për mediat, argumenton se “fondi për elitarët” duhet të ndahet në një përqindje edhe për të rinjtë. Pra, dyshimet që këta “elitarë” t’i japin vendit medalje të mëdha janë të pakta në vijim edhe për shkak të moshës, prandaj paratë duhet të shkojnë për të inkurajuar sportistët e rinj, që të përfitojnë përvojë, të garojnë me dinjitet e të rrisin rezultatet e tyre. I tillë ka qenë edhe qëndrimi i Hektor Shaqirit.
“Natyrisht, federata inkurajon sportistët nëpërmjet një stimuli financiar, kryesisht sportistët elitarë, por nga ky fond mund të tërhiqej mënjanë një pakicë parash për të rinjtë e spikatur, që t’u jepet një mundësi, të paktën 10 apo 20 mijë lekë të reja në muaj për disa të rinj që kanë premisa të mira, – ka sugjeruar trajneri veteran. – Është një shumë e papërfillshme, por i jep një shtysë fëmijës të ndjekë rregullisht stërvitjen. Në sporte si peshëngritja kjo është e domosdoshme, sepse vijnë fëmijët e varfër nga periferia dhe me shpenzime.”
“Paguajnë urban, paguajnë ujin, etj. – ka vijuar ai. – Pra, ca shpenzime të vogla duhen hequr, se vijnë si barrierë për fëmijët dhe i largojnë ata nga sporti. Duhet të kuptojmë gjendjen ku jemi dhe llogaritë bëhen thjeshtë fare. Mos harrojmë vështirësinë me të cilën përballen këta fëmijë, duke nisur nga stresi i përditshëm i udhëtimit, “bërrylat” me të cilën përballen në klub dhe më gjerë dhe u mohohen shanset. Nëse dëshiron të kesh sport cilësor duhet të investosh, ndryshe kot pretendon. E përmend federatën pasi e di që ajo mund të luajë rol pozitiv në këtë drejtim, brenda kapaciteteve të saj.”
“Ka një fond “grant” që mund ta menaxhojë më mirë, por që ta menaxhojë më mirë duhen pyetur specialistët, duhet marrë mendimi i ekspertëve”, – përfundon i mirënjohuri i i peshëngritjes shqiptare, Hektor Shaqiri.
