ASNN – Tirana ka bërë një përmbysje të pabesueshme, duket marrë fitoren në ndeshjen e parë të “play-off”-it final të Kampionatit Kombëtar të Volejbollit për Meshkuj. Edhe pse në disavantazh të dy seteve, bardheblutë e Sakos përmbysin 3-2. Fillimi është i ekuilibruar dhe krijoi përshtypjen e parë se dramaticiteti do ta shoqëronte deri në sekondën e fundit.
Pritshmëritë nuk zhgënjyen. Studenti fiton mes emocioneve setin e parë 25-21. Të njëjtën tablo ofron edhe seti i radhës. Vendësit udhëheqin 24-21, por të besuarit e Sakos ngushtojnë në 24-23. Një gabim i Pep- ës nga shërbimi i jep fitoren e setit Studentit 25-23 dhe 2-0 me sete. Por, për Tiranën, asgjë nuk ka përfunduar. Me lojtarë si Ferhati, Stepashkin, Medenica, Pepa e Xhija misioni nuk quhet kurrë i pamundur.
20-25 dhe 15-25 në favor të Tiranës dhe finalja shkon po me set final. Seti i pestë ishte tejet i ekuilibruar me Studentin që shkëputet 5-3 me bllokun Damyanov-Malaj ndaj Medenicës. Ferhati barazon 7-7. Një bllok i mirë i Studentit me Malajn i jep epërsinë 8-7, por Tirana vë sërish ekuilibrat me ukrainasin. 14- 13 për Tiranën, por Studenti përgjigjet me Vuldievin.
Pika finale 17-15 mban firmën në e Ramës në bllok ndaj Vuldievit. Me këtë fitore, bardheblutë marrin kryesimin 1-0.
