ASNN – Teuta mbledh pas 20 vjetësh 7 mijë vetë në stadium, por Partizani e ruan kreun. Këtë të shtunë u luajtën ndeshjet e javës së 16-të të Kategorisë Superiore, ku padyshim kryedueli luhej në Durrës, pikërisht në stadiumin “Niko Dovana”, ku Teuta priti Partizanin kryesues, në një ndeshje emocionuese, ku pavarësisht rrebeshit të shiut dhe terrenit të rënduar, skuadrat ia dolën të tregonin cilësi në lojë, të përcillnin emocione.

Por në fund do të ndanin nga një pikë të vlefshme për fatet e renditjes, megjithëse Partizanit i shkoi më për shtat barazimi 1-1. Në këtë ndeshje më mirë luajti Teuta, e cila e dominoi në tërësi takimin, krijoi mjaft raste për gol, por portieri Alban Hoxha bëri pritje të shumta. Në fakt një dalje e gabuar e Hoxhës në minutën e 8-të solli golin e Teutës, ku pas një goditje këndi topi përfundon tek Gashi.

Ai është i lirë dhe gjuan me kokë dhe shënon golin e epërsisë për durrsakët. Për minuta të tëra Teuta ka komandën në fushë dhe u jep emocion afro 7 mijë spektatorëve në stadium. Kaq shumë tifozë Teuta nuk kishte grumbulluar prej gati dy dhjetëvjeçarësh dhe ishte prania e tyre që i dha një dimension spektakolar duelit me të kuqtë kryeqytetas.

Këta të fundit e rritën ndjeshëm lojën e tyre në pjesën e dytë dhe me zgjuarsi në një kundërzbritje ia dolën të gjenin golin me anë të Asanit në minutën e 59-të. Deri në fund të dyja skuadrat tentuan ta fitonin ndeshjen, por hasën në mungesë finalizimi për shkak të perfeksionit që shfaqën dy portierët me pritjet e tyre. Në fund si Teuta, ashtu dhe Partizani morën nga një pikë.

Teuta mbeti në vend të katërt me 29 pikë, një më pak se vendi i dytë dhe i tretë, pra Skënderbeu e Kukësi. Kurse Partizani shkon në 35 pikë, 5 më shumë se ndjekësit dhe kjo pikë e mbushi me optimizëm edhe vetë trajnerin Skënder Gega që më mirë se kushdo tjetër kuptoi që në Durrës mori me fat një pikë, por një pikë që padyshim e kënaq sa i përket renditjes.

Kategoria Superiore

Java e 16-të

Të premten, 7 dhjetor 2018:

Kukësi – Skënderbeu          1-0

Të shtunën, 8 dhjetor 2018:

Tirana – Kastrioti                   4-0

Teuta – Partizani                   1-1

Të dielën, 9 dhjetor 2018:

Kamza – Luftëtari                 (14:00)

Flamurtari – Laçi                   (17:00)

Renditja

Nr.       Skuadra                     N.        F.         B.        H.        Gsh-Gp          Pikë

1. Partizani                    16        11        2            3        18-8                35
2. Skënderbeu              16          9        3            4        18-9                30
3. Kukësi                        16          9        3            4        16-9                30
4. Teuta                          16          8        5            3        19-12              29
5. Laçi                             15          7        5            3        13-10              26
6. Flamurtari                  15          6        4            5        13-11              22
7. Tirana                         16          3        5            8        17-19              14
8. Luftëtari                     15          4        1          10        11-17              13
9. Kastrioti                      16          3        1          12        11-29              10
10. Kamza 15          2        3          10          7-19                9