ASNN – Partizani thyen edhe një herë tjetër Barleti Volejin në volejboll për femra, duke dëshmuar se fitorja e para pak ditëve në kampionat nuk është rastësi, por është cilësi e grupit që ka trajneri Roland Tarja dhe njëherësh puna që po rrit paraqitjen e kësaj skuadre në të dy frontet e këtij sezoni, pra si në kampionat dhe në Kupën e Shqipërisë.

Pikërisht sot, Partizani mundi Barleti Volejin 3-2 në gjysmëfinalen e Kupës së Shqipërisë, të zhvilluar në kryeqytet.

Ishte një derbi i çmendur, një “fotokopje” e duelit të para pak ditëve në kampionat, ku fitorja e seteve gërshetohet dhe skuadrat shkojnë në setin final, në një duel emocionues. Vajzat e skuadrës së kuqe fitojnë lehtësisht setin e parë me shifrat 25-11, duke dhënë përshtypjen e një dueli të lehtë për ta, por Barleti Volej i trajnerit Hasan Gurabardhi u kundërpërgjigj në setin e dytë, duke fituar me shifrat 25-21 e duke kthyer barazpeshën.

Por Partizani dhe një herë tjetër do të dominonte në parket, duke fituar bindshëm setin e tretë 25-18. Barleti luan me sforco në setin e katërt, por këmbëngulja i dha suskes, pasi e fitoi këtë set me shifrat 25-21, duke barazuar rezultatin 2-2. Për të përcaktuar fituesin u desh seti final, i cili u fitua me meritë dhe bindshëm nga Partizani me shifrat 15-9 dhe krejt ndeshja me rezultatin 3-2. Një fitore shumë e vështirë, por e merituar e skuadrës së kuqe.

E cila do të presë në finale e ditës së diel pikërisht Mirditën, në një duel mjaft interesant për trofeun e parë të këtij sezoni. Gjithçka e hapur për dy skuadrat më të mira të momentit në volejbollin e femrave.

Kupa e Shqipërisë

Volejboll – Femra

Gjysmëfinalet

1 mars 2019:

Mirdita – Tirana                     3-0

(25-20, 25-19, 25-12)

Barleti Volej – Partizani       2-3

(11-25, 25-21, 18-25, 25-21, 9-15)

Finalja:

Të dielën, 3 mars 2019:

Partizani – Mirdita                 (17:00)