ASNN – U përcaktuan të premten skuadrat gjysmëfinaliste të “play-off”-it në volejboll për femra, pasi dyshes së parë, Mrditës dhe Barleti Volejit, i shtohen në këtë gjysmëfinale skuadrat e Parizanit dhe Tiranës. Dy skuadrat kryeqytetase fituan duelet e tyre të kthimit dhe siguruan pa vështirësi kualifikimin, me moral të lartë dhe pretendime të rritura për të bërë surprizën ndaj rivaleve të tyre që e mbyllën edicionin e rregullit të volejbollit elitar të femrave në dy vendet e para.

Partizani mposhti Vllazninë me rezultatin 3-0 dhe kjo është fitorja e dytë brenda pak ditësh, duke siguruar kështu një kalim në gjysmëfinale pa probleme. Në të vërtetë vajzat e skuadrës së trajnerit Roland Tarja vuajtën jo pak, pasi shkodranet bënë rezistencë. Megjithatë, Partizani ia doli të fitojë setet 25-19, 25-23 dhe 25-19 e krejt ndeshjen 3-0, duke pritur i qetë duelin me Mirditën.

Ndërkohë, në Pallatin e Sportit “Ramazan Njala” të qytetit të Durrësit, Teuta as nuk mundi të rivalizojë dot me Tiranën, e cila fitoi pastër the thellë 3-0, me një diferencë ekstreme në shifrat e seteve. Skuadra kryeqytetase e trajnerit Ardian Gorenxa fitoi setet me shifrat 25-14, 25-19 dhe 25-11, shifra që tregojnë qartë diferencën midis dy ekipeve në klasifikim.

Me këtë fitore të dyfishtë të Tiranës (pasi pati fituar edhe ndeshjen e parë çerekfinale të “play-off”-it), vajzat bardheblu kalojnë me meritë në fazën gjysmëfinale, ku përballë, sipas kalendarit, do të kenë Barleti Volej. Priten duele të zjarrta në të dy përballjet, megjithëse Mirdita dhe Barleti Volej shihen favorite për të shkuar në finale, nisur nga kualitetet që kanë grupet e tyre. Ndeshjet gjysmëfinale nisin ditën e hënë, më 15 prill 2019.