ASNN – Partizani përballet të premten në derbin e kryeqytetit me Tiranën dhe sot kanë dalë në një konferencë për shtyp trajneri Skënder Gega dhe mbrojtësi Egzon Belica. Për Gegën, derbi mbetet i veçantë dhe etja për fitore rritet edhe më tepër. Trajneri i Partizanit doli sot në konferencë shtypi, ku shpalosi objektivat e skuadrës së kuqe në prag të derbit me Tiranën. Ai u shfaq optimist për fitore dhe analizoi disa momente të skuadrës, si dhe gjendjen e grupit në tërësi.
“Derbin nuk mund ta ndryshoj se është caktuar për t’u bërë, – u shpreh trajneri i të kuqve, – njeriu hyn në këtë ndeshje me armët që ka. Për fat, Partizani është familje e madhe, ekipi është i kompletuar, mungesat mund të ndodhin në mënyra të ndryshme, duke qenë të lënduar e me kartonë. Kjo është mungesa, por e rëndësishme është që ekipi është gati dhe i karikuar, do të bëjmë të pamundurën të japim spektakël, të japim atë që presin tifozët tanë”.
“Një trajner gjatë gjithë javës i bën pyetje vetes që mund të jetë radha jonë apo e kundërshtarit, – vijoi Gega, – por nëse sheh ekipin tënd, e sheh si punon, rendimentin dhe arsyet pse kanë ardhur në këtë renditje, shtyn çdo trajner që të jetë optimist. Mendoj se do të jetë radha jonë përsëri”. Më pas vjen një mendim për tifogrupin më të madh kundërshtar, “Tirona Fanatics”: “Unë besoj se “Fanatics” mbështesin ekipin e tyre, i japin adrenalinë dhe atmosferë të mirë, e shtyjnë edhe pak më tepër”.
“Ata janë adrenalinë për ekipin e vet, për fat të mirë jemi me tifozët tonë, dashamirësit tonë. Do të shfrytëzojmë çdo moment të mirë që i shërben ekipit tonë”, – shtoi trajneri i Partizanit.
A ka diferenca mes dy skuadrave? Përgjigja e Gegës nuk lë vend për dyshime, secili ka anët e tij negative e pozitive dhe trajneri e di mirë këtë. “Besoj se ecuria jonë është ajo që tregon se kush është diferenca, – thotë ai, – jemi në vend të parë e kryesues, pavarësisht se kemi bërë tre humbje, kemi treguar se jemi ekip solid, me agresivitet, vrapon 90 minuta, ekip ku ndërthuret mirë përvoja me të rinjtë. Kjo është diferenca e madhe.”
“Jetojmë të dy palët në Tiranë dhe këtu nuk ka diferencë të madhe, – theksoi më tej trajneri Skënder Gega, -. Por ky kampionat, kjo fazë ka treguar se ne jemi të parët se e meritojmë. Pjesa tjetër është diferenca mes pikëve.”
