ASNN – Të hënën në mbrëmje, u luajt në kryeqytet kryedueli i javës së 9-të të Grupit A1 të Kampionatit Kombëtar të Volejbollit të Femrave, derbi midis Partizanit dhe Tiranës, e cila rezultoi të ishte një prej përballjeve më spektakolare të këtij edicioni dhe njëherësh një prej ndeshjeve më emocionuese. Fitoi Partizani me rezultatin 3-1, duke ia marrë Tiranës edhe vendin e 3-të në renditje.

Diferencën në fushë e bëri blerja e re e Partizanit, kubanezja Kasalis, falë lojës të së cilës Partizani mori 3 pikë të vyera për renditjen dhe tani kërcënon në renditje dy ekipet e kreut, që janë Mirdita dhe Barleti Volej, me përkatësisht 24 dhe 21 pikë. Seti i parë i ndeshjes ishte zhgënjyes për skuadrën e kuqe, pasi nuk e mbajti dot presionin që ushtruan vajzat bardheblu, që me meritë e fituan setin e parë me shifrat e thella 25-10.

U duk se Tirana do të fitonte një ndeshje stërvitore, por ishin bërë llogaritë gabim. Partizani ngjallet fuqishëm në setin e dytë, duke udhëhequr bindshëm 10-4 e 16-10, por në fund të setit, Tirana barazon shifrat e madje del një pikë para 23-22. Megjithatë, skuadra e Roland Tarjes e përmbysi, duke fituar setin me shifrat 25-23 dhe duke barazuar rezultatin me sete 1-1.

Seti i tretë ishte më i ekuilibruar, por diferencën në fund e bën kubanezja Kasalis, duke i dhënë Partizanit fitoren e setit me shifrat 25-18. Seti i katërt ishte më emocionuese dhe njëherësh më me rivalitet. Herë dilte para njëra skuadër e herë tjetra, duke dhuruar spektakël në fushë. Në fund, është Partizani që fiton setin me shifrat 25-23 dhe krejt ndeshjen me rezultatin 3-1, një fitore e madhe për vajzat e skuadrës së kuqe dhe trajnerin Roland Tarja, që tani ia marrin Tiranës vendin e 3-të në renditje.

Kampionati Kombëtar

i Volejbollit – Femra

Grupi A1

Java e 9-të

Të premten, 15 shkurt 2019:

Vllaznia – Barleti Volej         2-3

Të shtunën, 16 shkurt 2019:

Lushnja – Skënderbeu        2-3

Teuta – Mirdita                       1-3

Të hënën, 18 shkurt 2019:

Partizani – Tirana                 3-1

Renditja

Nr.       Skuadra         N.        F.         H.        Sete                Pikë

1. Mirdita            9          8          1          26-7                24
2. Barleti Volej   9          7          2          25-11              21
3. Partizani        9          7          2          22-10              20
4. Tirana             9          6          3          21-11              18
5. Teuta              9          3          6          11-19                9
6. Skënderbeu  9          3          6          10-21                8
7. Vllaznia         9          2          7          10-24                6
8. Lushnja         9          0          9            4-27                2