A

ASNN – Kategoria Superiore e Kampionatit Kombëtar të Futbollit ka vijuar  sot me dy takimet e tjera të javës së saj të 30-të dhe, duke nisur nga ora 16:00, Bylisi ka pritur në Ballsh Tiranën, në ndeshjen që u mbyll me rrjeta të paprekura. Ndërkohë, vëmendja e sportdashësve ka qenë e përqendruar tek takimi që u luajt në mbrëmje, midis Partizanit dhe Vllaznisë, pasi të kuqtë kryeqytetas kishin shansin për të ngushtuar hendekun që i ndante në krye të renditjes me Skënderbeun.

Dhe Partizani nuk ka gabuar, duke fituar me rezultatin 3-0 dhe duke u ngjitur në kuotën e 64 pikëve, dy më pak sesa korçarët kryesues. Kështu, çështja e titullit mund të quhet e rihapur, pas humbjes së dytë radhazi të Skënderbeut, kur duhen edhe 6 javë deri në fund të këtij sezoni.  “Kampionia” e Shqipërisë në 5 sezonet e fundit radhazi, u mund të shtunën në fushën e saj me rezultatin 2-3 nga Tërbuni i vendit të fundit, në atë që mund të quhet edhe surpriza e këtij sezoni.

Më herët të shtunën, Flamurtari mori një 3 pikësh me vlerë, duke fituar me shifrat 2-1 me përmbysje në fushën e Laçit. Kurse përballja direkte e rivaleve për vendin e tretë, Teuta-Kukësi, që u soll për sportdashësit drejtpërdrejt nga Rrjeti i Radio-Televizionit Shqiptar, u mbyll pa gola, një rezultat ky që lë të pandryshuar situatën e këtyre dy skuadrave në renditjen e Kategorisë Superiore.