ASNN – Vasil Shkurtaj vë në lëvizje Superioren, Kukësi dhe Partizani “mprehin shpatat” për sulmuesin vlonjat. Luftëtari ka në gjirin e tij një lojtar të talentuar si Vasil Shkurtaj, i cili ka bërë një prezantim shumë të mirë këtë edicion në radhët e Luftëtarit, duke qenë futbollisti më i mirë i skuadrës gjirokastrite. Ai ka shënuar gola me peshë për bluzinjtë dhe efikasiteti i tij në repartin sulmues ka bërë që të tërheqë vëmendjen e disa klubeve në Kategorinë Superiore.
Sulmuesi vlonjat është autor i 6 golave, po aq sa Rexhinaldo i Kukësit, e një më pak se Latif i Teutës. Pra Shkurtaj është kandidat për “Këpucën e Artë” këtë sezon dhe duke parë cilësitë e tij në fazën ofensive, dy klube kanë shpalosur objektivat për ta pasur në janar në gjirin e tyre. Janë Partizani dhe Kukësi, që kanë “mprehur shpatat” edhe një herë tjetër për zotërimin e tregut vendas.
Në këtë moment lojtari ka preferuar të heshtë, por e sigurt është se në janar do ta marrë një vendim. Dhe marrja e vendimit do të lidhet me pozicionin e skuadrave. Nëse Partizani do ta ruajë këtë epërsi deri në merkaton e dimrit, atëherë sulmuesi 26-vjeçar do të zgjedhë të kuqtë e kryeqytetit, në të kundërt, pra nëse Kukësi do të rikuperojë pikët dhe do të shfaqet si pretendent, atëherë ai mund të kalojë në klubin verilindor. Në fund një rol të madh do të luajë edhe “doza financiare” që do të ofrojnë presidentët Demi i Partizanit dhe Gjici i Kukësit.
