ASNN – Partizani i ka dhënë fund aventurës së tij në Ligën e Kampioneve, pasi është eliminuar në turin e 3-të eliminator të veprimtarisë më prestigjioze të klubeve të kontinentit, duke e humbur edhe ndeshjen e dytë përballë Salzburgut. Takimi midis austriakëve dhe të nënkampiones shqiptare, që u zhvillua të mërkurën dhe u soll për sportdashësit drejtpërdrejt nga Rrjeti i Radio-Televizionit Shqiptar, u fitua nga vendasit me dy gola të shënuar në pjesën e dytë.
Nuk ka patur një përsëritje të Ferencvaroshit, pasi Partizani është dorëzuar në Austri përballë Salzburgut, duke u mundur me rezultatin 2-0. Partizani i ka dhënë fund aventurës së tij në Ligën e Kampioneve, pasi është eliminuar në turin e 3-të eliminator të veprimtarisë më prestigjioze të klubeve të kontinentit, duke i humbur të dyja ndeshjet përballë Salzburgut. Ndonëse ishte mundur 0-1 para një jave në “Elbasan Arena”, Partizani shkoi në Austri për të rrezikuar gjithçka.
Por gjithçkaja e të kuqve kryeqytetas nuk ka mjaftuar përballë vendasve, të cilët e kanë fituar edhe ndeshjen e kthimit me rezultatin 2-0. Pjesa e parë e kësaj sfide, që u zhvillua të mërkurën dhe u soll për sportdashësit drejtpërdrejt nga Rrjeti i Radio-Televizionit Shqiptar, është mbyllur me rrjeta të paprekura, ndërsa gjithçka është vendosur në pjesën e dytë, në çerekorën e fundit, kur austriakët e kanë gjetur dy herë brenda 5 minutash rrugën e rrjetës.
Salzburgu ishte më ngulmues në pjesën e dytë, dhe gjen golin e parë në minutën e 76-të, me anë të Sorianos, duke vijuar të dyfishoi shifrat në minutën e 81-të, kur Uamberto përfitoi nga çoroditja e mbrojtjes së Partizanit dhe mposhti portierin Hoxha. Tanimë Partizani duhet të kënaqet me vendin në fazën e “play-off”-it të veprimtarisë së dytë të klubeve të kontinentit, Ligës së Evropës.
