ASNN – Në një deklaratë të dhënë për shtypin sportiv, mesfushori i Orikumit, Xhuljano Nurçe, u shpreh: “Po vijojmë me intensitet përgatitjet në vigjilje të ndeshjes së radhës, që do ta luajmë në shtëpi ndaj kryesuesve të Gramshit. Gramshi është pothuajse një nga skuadrat më të forta të këtij kampionati dhe kjo nuk ka nevojë për komente, ndërsa pozicionimi i asaj skuadre si kryesuese e grupit të Jugut e vërteton këtë fakt.”

“Ne vijmë me moral të lartë pas asaj fitoreje 2-0 në Ersekë ndaj Gramozit, – ka vijuar ai. – E kemi merituar atë trepikësh, pasi e kemi dominuar totalisht lojën dhe kemi ditur të administrojmë më së miri rezultatin e ndeshjes. Duke marrë parasysh objektivin që kemi këtë sezon, atë të ngjitjes për herë të parë në Kategorinë e Parë, besoj se fitorja do të jetë në krahun tonë.”

“Dhe për ne si Orikum, fitorja me Gramshin nuk është thjesht kalimi me sukses i një ndeshjeje, por më shumë se sa detyrim. Unë kam besim tek grupi i futbollistëve dhe me bindje të plota ju them se do t’i mposhtim kryesuesit e Gramshit. Në këtë takim kaq të vështirë presim edhe mbështetjen maksimale të tifozerisë orikumase”, – ka përfunduar deklaratën e tij mesfushori i Orikumit, vlonajti Xhuljano Nurçe.