ASNN – Portieri i Atletikos së Madridit, Jan Oblak, por edhe sulmuesit, Lionel Mesi i Barcelonës apo Kilian Mbapeja i Paris SG-së ishin zgjedhur në formacionin ideal të javës që lamë pas, pra në 11-shen më të spikatur. Natyrisht, 3-golëshi i Mesit dhe dygolëshi i Mbapesë nuk mund të anashkaloheshin nga gazetarët e mediave italiane dhe evropiane dhe nuk është rastësi që të dy ata formojnë majën e sulmit në formacionin e më të mirëve të javës.

Por në këtë listë është përzgjedhur si mesfushor i avancuar një shqiptar, i cili luan në kampionatin francez, me skuadrën e Reimsit. Bëhet fjalë për Arbër Zenelin, sulmuesin e shpejtë e të spikatur të përfaqësueses së dytë shqiptare në Ballkan, asaj të Kosovës. Zeneli kaloi në merkaton e dimrit nga Herenveni në Holandë tek Liga 1 e Francës, me Reimsin, duke u future menjëherë në rrjedhat e skuadrës dhe duke lënë gjurmë pozitive.

Në ndeshjen e fundit, skuadra e tij mundi Montpeljenë dhe Zeneli ishte një nga më të mirët në fushë, duke dhënë një pasim për gol dhe duke shënuar me 11-metërsh dhe, sipas analizës së përzgjedhësve, ai e meritonte plotësisht një vend në këtë listë. Rreshtimi në formacionin e yjeve të javës, krah Oblakut, Mesit e Mbapesë por edhe Delofëse apo Joviçit, shënon një pikë kulmore për mesfushorin e avancuar të përfaqësueses së Kosovës.