ASNN – Duket se më në fund po duket drita në fund të tunelit të errët të shkaktuar nga epidemia e koronavirusit edhe për sportin, ndonëse hapat janë shumë të vegjël dhe të matu. Kështu, teksa Gjermania ka lejuar stërvitjen e skuadrave të Bundesligës së futbollit në grupe të vogla lojtarësh, një lajm i mirë vjen edhe nga fqinja e saj juglindore. Sipas Agjencisë së Lajmeve “Reuters”, edhe Austria ka nisur të zbusë masat kufizuese, ndërsa njoftuar të mërkurën se do të lejojë disa sporte që janë në përputhje me rregullin e distancës sociale, të tillë si tenisi e golfi, të rinisin më 1 maj.
Austria pati futur në fuqi masat kufizuese katër javë më parë, duke u thënë njerëzve të qëndrojnë të gjithëve në shtëpi dhe të punojnë nga shtëpia nëse është e mundur. Por, ndryshe nga shtete tjera, qytetarët janë lejuar të bëjnë vrapime e çiklizëm, por me kusht që të ruajnë distancën sociale. “Sigurisht, sportet individuale ku nuk ka kontakt të madh do të kenë përparësi kundrejt sporteve ekipore, ku kontakti është i paevitueshëm”, – ka thënë zëvendës-kancelari Verner Kogler, i cili është edhe Ministër i Sportit, duke folur për agjencinë në fjalë.
Infrastruktura sportive në natyrë nuk do të jetë më e ndaluar për publikun, përfshirë pistat e atletikës, fushat e tenisit, golfit, kalërimit, poligonet e qitjes e të harkëtarisë. Austria ka raportuar deri më 393 të vdekur nga koronavirusi. Por tanimë rreth 600 sportistë elitarë do të lejohen t’i kthehen stërvitjeve javën e ardhshme, përfshirë edhe në mjedise të mbyllura, por me limite më të rrepta të distancës. Planet janë duke u bërë për të rifilluar ligën elitare të futbollit, me kërkesa strikte për testim dhe ndeshjet të luhen pa shikues.
Se si do të mund tenisi të praktikohet në mënyrë të sigurt, Kogleri ka thënë se këtë do t’ia lërë në dorë federatës. “Është vështirë të besohet se sa shumë pyetje dalin, – ka thënë ai. – Si të veprohet me topin? Konsultimet fillestare me Federatën e Tenisit kanë nxjerrë 10 rekomandime, përfshirë edhe sjellje të ndryshme në rrjetë.” Po kështu, qeveria e Austrisë ka njoftuar se nuk do të kundërshtojë organizimin e garës së Formulës 1, por pa praninë e shikuesve, ndonëse këtu çështja ndërlikohet nga kufizimet e udhëtimeve ndërkombëtare për personelet e skuadrave.
