Kombëtarja shqiptare e Shpresave e ka mbyllur në barazim pa gola përballjen me Greqinë, e cila është luajtur mbrëmë në Stadiumin “Elbasan Arena”, teksa ka qenë e vlefshme për Eliminatoret e Evropianit 2017 të Nën-21-vjeçarëve. Me këtë rezultat Shqipëri e Nën-21-vjeçarëve u ngjit në kuotën e 9 pikëve, në vendin e dytë, ndërsa vendi i parë i renditjes së grupit mbahet nga Portugalia me 18 pikë.

“Në këtë ndeshje erdhëm për të fituar, – ka deklaruar trajneri i Nën-21-vjeçarëve të Greqisë. – Krijuam raste për ta fituar, por nuk mundëm të kishim fatin e golit. Ishim më të mirët, por fatkeqësisht nuk arritëm të shënonim. Shqipëria ka një ekip të mirë dhe më pëlqen, por s’mund të flas për lojtarë në veçanti. Nuk kemi asnjë problem me fëmijët shqiptarë që luajnë në Greqi.”

“Përkundrazi ata janë shumë të mirë dhe ne i përkrahim, – ka vijuar ish-portieri i helenëve, “kampion” i Evropës më 2004-ën. – Ne gjithashtu kemi ekip shumë të mirë. Nuk kam yje në ekip, por një skuadër që luan në grup. Siç e kemi parë, në grupin tonë eliminator të gjitha skuadrat janë të rrezikshme dhe të forta që mund të marrin vendin e dytë.”

Në fakt, ndeshja nisi me një minutë heshtje në nderim të viktimave të ngjarjeve terroriste të ndodhura në kryeqytetin e Belgjikës, Bruksel. Heshtja u mbajt edhe në nderim të legjendës së futbollit holandez dhe atij botëror, Johan Krojf, i cili u nda nga jeta dje në moshën 68-vjeçare, pasi humbi betejën me sëmundjen e rëndë. Ndërkohë himni shqiptar ka nisur me vonesë, kurse ai grek është vërshëllyer nga tifozët kuqezi.