Grushta mes lojtarëve të të dy palëve, tre kartonë të kuq të akorduar nga kryesori Stolaj. Derbi i të rinjve mes Dinamos dhe Tiranës, që është zhvilluar dje në mesditë në fushën me bar artificial të ish-kompleksit blu, nuk ka përfunduar normalisht.

Me të vërtetë ka fituar Tirana, por në minutën e 85-të, ndeshja është përfshirë nga një sherr masiv mes lojtarëve. Fillesa e sherrit ka qenë një ndërhyrje e Marinajt të Dinamos ndaj Koldashit të Tiranës, ndërsa ky i fundit e ka ofenduar futbollistin blu.

Kaq ka mjaftuar dhe menjëherë ka ardhur reagimi i këtij të fundit, ndërsa në zënkën masive janë përfshirë lojtarët e të dy skuadrave. Përtej ndërhyrjes së stafeve teknike, për 2-3 minuta kaosi ka mbërthyer ndeshjen dhe ka pushtuar fushën.

Dhe vetëm pasi është qetësuar situata, ndërsa kanë ndërhyrë dhe forcat e rendit, gjyqtari Albano Stolaj ka ndëshkuar me karton të kuq Koldashin e Tiranës, si dhe Marinajn e Bermetën e Dinamos.

Në përgjithësi një fund jo i këndshëm i derbit, që edhe për drejtuesit e bardhebluve, të cilët ishin fitues të saj, nuk ishte normal.