ASNN – Shqipëria e Nën-19-vjeçarëve në futboll ka fituar ndeshjen e parë me bashkëmoshatarët e Malit të Zi, me rezultatin 3-1, të zhvilluar këtë të premte në Podgoricë. Trajneri Armando Cungu e nisi lojën me këtë formacion: Vajper, Dervishi, Bytyqi, Nerguti, Azizi, Alivoda, Pjeshka, Mata, Toci, Berisha dhe Janaqi. Kuqezinjtë e nisën shumë mirë lojën, duke krijuar që në minutat e para rrezik në portën kundërshtare dhe duke kontrolluar mirë topin. Që në minutën e 5-të të takimit, Kristian Dervishi kroson nga e djathta një top brenda zonës për Eljo Toçin, i cili godet me kokë por topi përfundon mbi kuadrat.
Pak minuta më vonë, është Paulo Pjeshka që merr përsipër të gjuajë një goditje dënimi, por topi përfundon në duart e portierit kundërshtar. Kuqezinjtë krijojnë edhe disa raste të tjera, duke tentuar të gjejnë golin e epërsisë, por pjesa e parë mbyllet me rrjeta të paprekura. Në fraksionin e dytë të lojës, trajneri Cungu bën disa zëvendësime, duke i dhënë mundësinë 8 lojtarëve të tjerë të futen dhe të tregojnë vlerat e tyre në fushë. Edhe në këtë gjysmë të dytë të lojës, Kombëtarja shqiptare luan mirë dhe arrin të kontrollojë lojën.
Rezultati do të zhbllokohej vetëm në minutën e 58-të, pasi Bilario Azizi jep një top të gjatë nga mbrojtja për sulmuesin e Fiorentinës, Eljo Toçin, i cili e merr mjaft mirë, duke e dërguar topin në rrjetë. 3 minuta më vonë, Eljo Toçi gjen sërish golin, pas një pasimi të dhënë bukur nga Dejvid Janaqi. Kuqezinjtë janë kështu në epërsi të dyfishtë në brenda pak minutash, ndërsa për të trefishuar shifrat do të mendonte Kristian Shpendi, i cili shënon një supergol nga jashtë zone në minutën e 77-të, pas një gabimi të mbrojtjes kundërshtare.
Në kohën shtesë, gjyqtari akordon një 11-metërsh në favor të malazezëve, të cilët e shndërrojnë në gol. Ndeshja mbyllet kështu me rezultatin përfundimtar 1-3, me kuqezinjtë që zhvillojnë një ndeshje mjaft të bukur dhe të mirë. Në fund të takimit, trajneri Armando Cungu u shpreh i kënaqur me lojën e skuadrës së tij. Pas 4 ditësh, Shqipëria e Nën-19-vjeçarëve do të luajë një tjetër miqësore, po ndaj bashkëmoshatarëve të Malit të Zi, me takimin që do të zhvillohet në po të njëjtin vend.
Trajneri Armando Cungu do të ketë mundësinë të shikojë edhe njëherë të gjithë lojtarët e tjerë e thirrur në këtë grumbullim. Këto dy miqësore do t’i shërbejnë trajnerit kuqezi për të kolauduar grupin përfundimtar në kuadër të ndeshjeve të Eliminatoreve të Kampionatit Evropian 2022, që do të luhen në Shqipëri në datat 10, 13 dhe 16 nëntor 2021 dhe ku Nën-19-vjeçarët e Cungut shorti i ka vendosur në grupin 7, së bashku me Francën, Serbinë dhe Maqedoninë e Veriut.
