ASNN – Përzgjedhjet e Kombëtares së Nën-19-vjeçarëve në futboll, Cungu: “Elementë cilësorë, mund të na ndihmojnë në të ardhmen”. Prej fillimit të vitit stafet e ekipeve Kombëtare të moshave kuqezi kanë organizuar dhe zhvilluar disa përzgjedhje dhe grumbullime me të futbollistë që luajnë në kampionatin vendas dhe jashtë vendit.
Ditën e enjte, ka qenë radha e ekipit Kombëtar të Nën-19-vjeçarëve për të zbritur në fushë dhe për të zhvilluar seleksionimin e parë këtë vit me lojtarë të kampionatit shqiptar të vitlindjes 2004. Rreth 30 futbollistë kanë qenë nën urdhrat e trajnerit Armando Cungu dhe stafit kuqezi, të cilët kanë testuar lojtarët e grumbulluar, duke zhvilluar fillimisht stërvitje.
E më pas edhe një ndeshje kontrolli, me futbollistët e ndarë në dy ekipe, të cilët kanë pasur mundësi të tregonin cilësitë e tyre. Kuqezinjtë e vegjël kanë qenë edhe më parë pjesë e seleksionimeve dhe grumbullimeve të ekipeve zinxhir të moshave. Në një prononcim të shkurtër për faqen zyrtare në Internet të Federatës Shqiptare të Futbollit, trajneri Cungu e vlerëson këtë mundësi për të kontrolluar gjendjen e lojtarëve.
Ai thekson edhe se kjo datëlindje ka lojtarë me cilësi, të cilët mund të ndihmojnë në të ardhmen edhe Kombëtaren e të rriturve. “Siç kemi bërë edhe vitin e kaluar, është një moment ku kemi mundësi dhe kohën e duhur për të parë nivelin apo gjendjen e çdo sportisti në këtë fillim viti, – ka thënë trajneri shkodran duke folur për qëllimi e kësaj përzgjedhjeje.
“Normalisht që fokusi kryesor është te përzgjedhja e lojtarëve të kampionatit shqiptar, me të cilët vitin e kaluar ka punuar trajneri i asaj grupmoshe, Ardi Behari, i cili ka bërë një punë shumë të mirë, – ka vijuar Cunguar. – Natyrshëm që tani vjen edhe momenti për të kaluar nga Nën-18 tek Nën-19-vjeçarët ku do të shohim gjendjen reale të tyre.”
“Duke sjellë herë pas here edhe lojtarët që vijnë nga jashtë Shqipërisë për t’i parë e për t’i kontrolluar sepse numri është shumë i konsiderueshëm dhe këto janë momentet më të mira edhe për ne si staf për t’i pasur para syve për t’i vlerësuar”, – ka shtuar ai. Po a mendon Cungu kjo datëlindje ka elementë cilësorë dhe potencial për të ardhmen? “
“Çdo datëlindje ka individët e saj, ka lojtarë me cilësi të mira, ka lojtarë që aderojnë në kampionatet jashtë vendit tonë, por edhe në vendin tonë ka futbollistë me cilësi shumë të mira, – përgjigjet trajneri kuqezi. Jam i bindur, që ashtu si me 2003-shat që bëmë paraqitje shumë të mira, jam i bindur që edhe kjo datëlindje ka potencialet e veta dhe ka lojtarë që mund të ndihmojë nesër në ekipin e parë.
