ASNN – Trajneri i Kombëtares së Nën-19 vjeçarëve, Erjon Bogdani, publikoi sot listën e lojtarëve që ai ka ftuar për edicionin e ri në vijim dhe sidomos për dy miqësoret e radhës kundër Rumanisë, që luhen në Stadiumin “Loni Papuçiu” të Fierit, më 18 dhe 20 nëntor 2018.
Ndryshe nga e shkuara, Bogdani ka ftuar shumë pak lojtarë nga Kategoria Superiore, vetëm 3 të tillë, Malajn e Partizanit, Rrapajn e Flamurtarit dhe Muçin e Tiranës. Të tjerët janë të gjithë prurje nga Europa. Për t’u vënë në pah është emri në listë i talentit shqiptar të Olimpiakosit, Emiljano Bullari.
Ai kishte marrë ftesë edhe nga përfaqësuesja e Greqisë për këtë moshë. Në fakt, federate greke kishte ditë që ishte vënë në lëvizje, pasi sinjaleve që i kishin dërguar drejtuesit e klubit të Olimpiakosit dhe për t’i dhënë një mundësi të vishej grek, Bullarit i ishin premtuar edhe lehtësira.
Por FSHF mori masa dhe i ka bërë ftesë djaloshit të talentuar shqiptar, duke dashur që ai të mos përfshihet në ekipin grek. Por gjasat janë që futbollisti të zgjedhë sipas dëshirës së tij dhe nuk përjashtohet më vonë të ketë preferencë të parë përfaqësuesen greke.
