ASNN – Rrjeti i Radio-Televizionit Shqiptar vazhdon transmetimet sportive dhe ka sjellë sot për sportdashësit drejtpërdrejt një tjetër duel interesant. Bëhet fjalë për finalen e Kupës së Shqipërisë në futboll për Nën-17-vjeçarët, që u luajt pasdreke në Stadiumin “Elbasan Arena”, duke nisur nga ora 13:30.
Në duelin final për këtë trofe kanë qenë përballë njëra-tjetrës Tirana dhe Vllaznia. 80 minutat e kohës së rregullt të kësaj sfide, ku Tiranës i është anuluar në mënyrë kontradiktore një gol i rregullt në pjesën e parë dhe Vllaznia ka goditur shtyllën në pjesën e dytë, janë mbyllur sidoqoftë me rrjeta të paprekura.
Kështu, gjithçka është vendosur nga goditjet e 11-metërshave ku Tirana është treguar më e saktë, duke bërë të vetën edhe trofeun. Ndërkohë, të mërkurën e ardhshme, transmetuesi publik do të sjellë drejtpërdrejt edhe finalen e Kupës së Shqipërisë në futboll për femra, midis Vllaznisë dhe Apolonisë.
