ASNN – Teuta e Nën-17-vjeçarëve fiton Kupën e Shqipërisë, të mërkurën radha e 19-vjeçarëve. Kupa e Shqipërisë për moshën deri në 17-vjeç dhuroi sot emocionin e finales, pasi Teuta dhe Flamurtari u përballën në stadiumin “Elbasan Arena”. Dy skuadra nga qytetet bregdetare luajtën mundësinë e tyre të parë sezonale për trofe, por në fund buzëqeshja shkoi për djemtë e Teutës, e cila e fitoi ndeshjen me rezultatin 1-0.
Ishte Endri Qehaja i cili realizoi për skuadrën durrsake në minutën e 14-të, një gol që rezultoi vendimtar sepse rezultati nuk ndryshoi më deri në fund dhe pavarsisht përpjekjes së vlonjatëve për të barazuar, Teuta ia doli ta ruajë epërsinë dhe ta fitojë takimin, duke bërë të vetën edhe trofeun Kupës së Shqipërisë për këtë moshë. Në tërësi ishte një ndeshje e bukur, me rivalitet dhe që prodhoi emocione.
Ndërkohë, finalja e Kupës së Shqipërisë për moshën deri në 19-vjeç do të luhet ditën e mërkurë, në orën 12:00, po në stadiumin “Elbasan Arena”, ku do të përplasen Vllaznia dhe Besa, dy skuadra me traditë në futbollin shqiptar. në këtë edicion, për këtë moshë, ky është një moment që vlen sepse është në “valle” një nga trofetë e rëndësishëm të vitit. Natyrisht, pretendente janë shkodranët, që kanë një skuadër me element cilësorë.
