ASNN – Trajneri i Kombëtares së Nën-15-vjeçarëve, Armand Dama ka publikuar listën me emrat e 23 lojtarëve që do të grumbullohen për dy miqësoret me bashkëmoshatarët e Malit të Zi këtë muaj. Bëhet fjalë për futbollistë të vitlindjes 2007, me shumicën prej tyre që luajnë në kampionatin shqiptar, ndërsa 4 aktivizohen me ekipe të huaja. Më konkretisht portieri Mark Topollaj (Verona), mbrojtësi Davide Avdullari (Verona), mesfushori Mateo Dashi (Kristal Palas) dhe sulmuesi Matias Gici (Venecia).
Siç është bërë e ditur nga Departamenti i Komunikimit në Federatën Shqiptare të Futbollit (FSHF), përfaqësuesja kuqezi do të zhvillojë dy ndeshje miqësore me Nën-15-vjeçarët e Malit të Zi në datat 26 dhe 28 tetor 2021. Të dyja ndeshjet do të luhen në Podgoricë dhe do të nisin në ora 14:00. Skuadra kuqezi do të udhëtojë pasditen e të shtunës drejt Ulqinit ku do të akomodohet dhe të dielën do të zbresë në fushë për të nisur përgatitjet për miqësoret. Grumbullimi do të zgjasë 6 ditë dhe stafi teknik do të ketë mundësi të shohë në aksion lojtarë të vitlindjes 2007.
Synimi i këtyre ndeshjeve është për të monitoruar ecurinë dhe gjendjen e këtyre lojtarëve e për të përzgjedhur elementët e perspektivës që mund të jenë të vlefshëm për të kaluar në ekipet Kombëtare të Nën-16-vjeçarëve, Nën-17-vjeçarëve e me radhë. Gjatë muajve të fundit stafi teknik i Kombëtares së Nën-15-vjeçarëve ka kryer disa përzgjedhje dhe grumbulime, por pa pasur mundësi të marrë pjesë në aktivitete zyrtare të pezulluara për shkak të epidemisë së Covid-19. Sidoqoftë, ka nisur puna për rikonstruktimin e skuadrës për vitin 2021.
Kjo, pasi Shqipëria e Nën-15-vjeçarëve do të marrë pjesë në “UEFA Develpoment Tournament”, turneu kontinental për këtë grupmoshë. Lojtarë e grumbulluar kanë qenë vazhdimisht nën monitorimin e specialistëve të ekipeve kombëtare, pasi kanë pjesë e përfaqësueseve rajonale dhe kanë marrë pjesë nëpër turnetë e organizuara nga Zyrat Rajonale të FSHF-së. Më poshtë, edhe lista e lojtarëve të grumbulluar për dy miqësoret.
