Kafazi i hekurt gjashtëkëndësh sjell alternimin e të gjitha disiplinave të arteve parciale. Presidenti Rizai: “Jam i kënaqur nga numri i pjesëmarrësve, vitin tjetër më shumë veprimtari”. Kanë qenë 41 pjesëmarrës, 38 djem dhe 3 femra, të cilat kanë përfaqësuar 9 skuadra në Kampionatin e Ndeshjeve të Lira.

Dhe e gjithë kjo pjesëmarrje e ka kënaqur presidentin e Federatës Shqiptare të Ndeshjeve të Lira, Arjan Rizai, si dhe drejtorin teknik Anastas Kobuzi. Sipas presidentit Rizai synohet jo vetëm shtimi i aktiviteteve, por dhe pjesëmarrja dinjitoze në të gjitha veprimtaritë ndërkombëtare.

“Ne do të rrisim numrin e aktiviteteve, ndërsa do të ketë brenda dy muajve një kampionat kombëtar të moshave, si kërkesë për rigjenerimin e brezave e pse jo dhe për vazhdimin e traditës në këtë sport, – ka deklaruar ai. – Jo vetëm kaq, por do të fusim në kalendarin e aktiviteteve kombëtare dhe Kupën e Shqipërisë.”

“Dhe të gjitha këto do të synojnë një përgatitje serioze për të marrë pjesë në aktivitetet ndërkombëtare”, – ka përfunduar presidenti i Federatës Shqiptare të Ndeshjeve të Lira, Arjan Rizai.