ASNN – Kampionati amerikan i basketbollit, NBA, nisi zyrtarisht sot. Kampionia në fuqi, Golden Stejt, e nisi me fitore edhe këtë edicion të ri, duke korrur një fitore të rëndësishme përballë Okllahoma Sitit, me shifrat 108-100.
Skuadrës së Okllahomës u mungonte ylli i grupit, pikërisht Rasëll Uestbruk. Stefën Këri ishte lojtari më i mirë i Golden Stejt në parketin e lojës, me 32 pikë të shënuara, 8 topa të zotëruar në tabelë dhe 9 pasime për kosh.
Ai ka bërë kështu paraqitjen e parë fantastike për këtë edicion të ri të basketbollit amerikan. Ndërkohë, ndeshja tjetër e kësaj jave hapëse në NBA, ishte ajo mes Boston Sëlltiks dhe Filadelfias 76, e cila u fitua nga skuadra e Bostonit me shifrat 105-87.
Pra një fitore bindëse që jep shpresë për vazhdimësinë e kësaj skuadre këtë sezon. Në NBA surprizat dhe spektakli nuk kanë fund, prandaj dhe ky edicion i ri basketbollistik në SHBA pritet të marrë vëmendje maksimale.
