ASNN – Los Anxheles Lejkërs po vuajnë këtë sezon në Konferencën e perëndimit në Kampionatin Amerikan të Basketbollit (NBA). Lejkërsat humbën mbrëmë ndaj Denver Nagets në Pallatin e Sportit “Stejpëlls Sentër”. Ishte një humbje e rëndë me shifrat 95-115. 20 pikët diferencë tregojnë qartë dominimin e Nagetsave, por njëherësh edhe dobësinë e Lejkërsave, të cilët këtë sezon rrezikojnë plotësisht të mos jenë në “play-off”.
Një sezon që duket se po shkon drejt dështimit për skuadrën e famshme të Perëndimit. Madje Lejkërsave nuk po u vjen në ndihmë as gjigandi LëBron Xhejms, i cili është rikthyer në formë këto ditët e fundit dhe po shënon si “i marrë”, por as kjo nuk mjafton për LA Lejkërs që vetëm pësojnë disfata dhe bien në renditje, duke qenë tashmë larg zonës 8-shes së parë. Por në këtë sitiuatë të trishtë LëBron Xhejms ka thyer një tjetër rekord personal brenda pak ditësh.
Ai është bërë lojtar i 4-t më i mirë i historisë së NBA-së si pikëshënues, duke parakaluar një legjendar të basketbollit amerikan si Majkëll Xhordan. Në ndeshjen ndaj Denver Nagets, Xhejms realizoi 31 pikë dhe kapi shifrën e 32 311 pikëve në karrierë, duke parakaluar Xhordanin me 19 pikë, pasi Majkëlli “fluturues” dhe i papërsëritshëm e ka mbyllur karrierën e tij në shifrën e 32 292 pikëve. Tanimë “Mbreti” Xhejms e ka hedhur vështrimin drejt 3-shes së parë të shënuesve.
