ASNN – Ka qenë një mbrëmje “e çmendur” kjo e sotmja në veprimtarinë e dytë të klubeve të kontinentit, Ligën e Evropës. Përmbysje spektakolare e Borusias së Dortmundit në Norvegji, nga 3-0 në 3-4, Atletiko e Bilbaos udhëhiqte 2-0 në pjesën e parë, ndërsa në fund Zhilina fitoi 3-2. Edhe AZ Alkmari shënoi dy herë në Rumani ndaj Astra Giurgiut, por rezultati u përmbys në 3-2 nga vendasit.

Brenda 22 minutave të para, Dortmundi gjendet në disavantazh të 3 golave në Norvegji përballë Odd Groenlandës BK, por vendosmëria e gjermanëve bëri që rezultati përfundimtar i ndeshjes të ishte 3-4 në favorin e tyre. Për verdhezinjtë shënoi dy gola Aubamejang, ndërsa dy të tjerët u shënuan nga Kagaua dhe Henrikh Mkhitarjan. Një përmbysje e madhe ndodhi edhe në Sllovaki.

Spanjollët e Bilbaos shënuan 2 herë në pjesën e parë, ndërsa 45 minutat e dyta të ndeshjes ishin për t’u harruar për fituesit e e sapokurorëzuar të Superkupës në Spanjë. Vendasit shënuan dy herë deri në minutën e 77-të, duke barazuar rezultatin, ndërsa në minutën e 4 të shtesës shënuan edhe golin e fitores. Një fitore të pastër, mbrëmjen e së enjtes arriti PAOK-u i Ergys Kaçes.

Grekët fituan 5-0 në ndeshjen e parë ndaj danezëve të Brondbit, duke vulosur praktikisht kualifikimin dhe vendin në fazën e grupeve të Ligës së Evropës. Ndeshjet e kthimit të fazës së “play-off”-it të veprimtarisë e dytë të klubeve të kontinentit, Ligës së Evropës, ku do të vendosen ekipet që do të kalojnë në fazën e grupeve, do të zhvillohen të enjten e javës së ardhshme.

Liga e Evropës

Ndeshjet e para të “play-off”-it

Ja rezultatet e ndeshjeve të së enjtes:

Astra Giurgiu – AZ Alkmar              3-2

Dinamo Minsk – Salcburg               2-0

FK Kabala – Panathinaikos                        0-0

Ajaks – Jablonec                               1-0

Krasnodar Kuban – HJK Helsinki 5-1

Slovan Liberec – Hajduk Split        1-0

Molde – Standard Liezh                  2-0

PAOK Selanik – Brondi                   5-0

Sparta Pragë – FC Thun                 3-1

Zorja – Legia Varshavë                    0-1

Milsami Orhei – St. Etienë               1-1

Atromitos – Fenerbahçe                  0-1

Rabotniçki – Rubin Kazan              1-1

Steaua Bukuresht – Rozenborg    0-3

Jang Bojs – Karabag                       0-1

Zhilina – Atletiko Bilbao                  3-2

Altah – Belenenses                          0-1

Bordo – Kairat Almati                       1-0

Odd Ballklub – Borusia Dortmund 3-4

Viktoria Plzenj – Vojvodina             3-0

Leh Poznan – Videoton                  3-0

Sauthempton – Midtjylland             1-1