ASNN – Shqipëria e mundjes ka zënë vendin e dytë në Kupën “Adem Jashari”, e cila të dielën është zhvilluar në Han të Elezit në Kosovë. Kjo kupë ka pasur përmasa ndërkombëtare, sepse në të, përveç Shqipërisë dhe Kosovës, kanë marrë pjesë edhe Maqedonia, Qiproja turke, Bullgaria, Bosnje-Hercegovinë, Turqia dhe Franca. Shqipëria ka marrë pjesë me 7 mundës, të cilët janë pjesë e Tiranës dhe Kukësit, kurse delegacioni është drejtuari nga i pari i klubit sportiv verilindor, Kujtim Kovaçi.
Mundësit kanë marrë gjithsej 7 medalje, që ishin 3 të arta, nga Orgest Lila, i peshës 65 kilogram, Omar Lila, i peshës 86 kilogram, dhe Egzon Shala, i peshës 120 kilogram. Po kështu janë 3 medalje argjendi, të fituar nga Ordis Lila, i peshës 61 kilogram, Festim Çengu, i peshës 70 kilogram, dhe Klodian Bulica, i peshës 97 kilogram. Gjithashtu është dhe një medalje bronzi, e cila është fituar nga Bekim Shaqiri i peshës 65 kilogram.
Në përfundim, kjo dhe sipas informacionit që ka dhënë Sekretari i Përgjithshëm i Federatës Shqiptare të Mundjes, Ndriçim Spahiu, Kosova është shpallur fituese e turneut “Adem Jashari”, teksa vendësit kanë grumbulluar 26 pikë. Në vendin e dytë ka ardhur Shqipëria me 24 pikë dhe në të tretin Maqedonia. Ky vend i dytë në Turneun Ndërkombëtar “Adem Jashari” i bashkohet medaljeve ballkanike të mundjes, si dhe pjesëmarrjeve të mira në Kampionatet Evropiane dhe Botërore.
