Pas akuzave që kanë bërë një grup trajnerësh të mundjes shqiptare ndaj Sahit Prizrenit, siç ishte Burhan Arapi, Roland Tusha, Leonard Çakmashi, Altin Shtjefni, Avni Hasën, Joel Gjelaj dhe Sajmir Loshin, të cilët i kanë kujtuar mundësit të mirat që Viron Bezhani ka bërë për të, ka ardhur reagimi i vetë të akuzuarit. Për mediet shqiptare, Prizreni do të deklaronte: “Sahit Prizreni ka folur dhe do të flasë për mundjen dhe drejtësinë”.

“Unë nuk do të përmend emra në lidhje me personat që kanë të bëjnë me atë çka është thënë në lidhje me mua dhe familjen time, sepse lajkatarët dhe burracakët nuk e gëzojnë këtë privilegj, – ka vijuar ai. – Unë kam qenë dhe jam i hapur për t’u përballur me këdo në lidhje me problemet dhe padrejtësitë që më janë bërë mua personalisht, mundjes dhe së fundmi Egzon Shalës.”

“Po nëse dikush mendon se mund të më ndalojë duke shpifur dhe përmendur familjarët e mi dhe akoma më keq kur bëhet fjala për sport po ju them që kanë gabuar rëndë sepse familja është e shenjtë, – ka theksuar olimpisti shqiptar. – Por fatkeqësisht kjo është demokracia në Shqipëri dhe e drejta e fjalës së lirë. Madje edhe atëherë kur dikush ka teka dhe dëshirë të shkruajë që në rastin konkret është tejkaluar jashtë mase”.

Ky ka qenë reagimi i Sahit Prizrenit nga Gjermania, ndërsa ajo që duhet pranuar është fakti se Viron Bezhani si presidenti i Komitetit Olimpik Kombëtar Shqiptar nuk ka nevojë të mbrohet prej të tjerëve, sepse mund të mbrohet më mirë vetë. Dhe në të njëjtën kohë, për pozicionin që ka dhe për asnjanësinë që kërkon sporti edhe duke qenë në krye të KOKSH, nuk mund të bëjë vazhdimisht tifozllëk për një palë, apo për një palë tjetër në mundje. Sepse aty është për të pajtuar, kjo dhe për të mirën e sportit, e jo për të ndarë…