Egzon Shala ka zënë vendin e 5-të në garën kualifikuese për në Lojërat Olimpike “Rio de Zhaneiro 2016”, e cila është zhvilluar në Zrenjanjin të Serbisë. Ishte turi i Evropës dhe si të tillë Shala duhet ta kishte shfrytëzuar më mirë, sepse jo vetëm që mund të merrte medalje, ka qenë shumë pranë bronzit, por dhe mund të kishte marrë kualifikimin për në Olimpiadë.
Në peshën 97 kg fillimisht ka mundur bjellorusin Ivan Jankuski, 4-3. Më pas në turin e dytë, është vënë përballë gjermanit Erik Sven Tiele, që është vendi i tretë në Evropianin e fundit, ndërsa e ka mundur 6-4. Në gjysmëfinale është vënë përballë turkut Ibrahim Bolukbasi, ndërsa është mundur 4-12 në një ndeshje që sipas drejtuesve të Federatës Shqiptare të Mundjes e ka humbur për mospërqendrim.
Dhe në duelin për medaljen e bronztë me sllovakun Jozef Jaloviar ka humbur 6-3, ndërsa ishte në epërsi. Përfundimisht në vendin e 5-të, në një farë mënyre një përfaqësim më i mirë se sa Kampionati Evropian në mars. Por që tashmë për kualifikimin me normë për në Lojërat Olimpike “Rio de Zhaneiro” duhet të luftojë fort në Ulan-Bator të Mongolisë, nga data 22, deri më 24 prill 2016, dhe më pas në Stamboll.
E deri atëherë Shqipëria e mundjes do të vijojë të jetë pa sportist të kualifikuar me normë në Olimpiadë.