ASNN – Vinjalesi rinovon me “Jamaha”-n, ndërsa mbetet për t’u parë e ardhmja e Rosit, kontrata e të cilit ka skaduar. “Jamaha” ka vendosur t’i besojë sërish Maverik Vinalesit. Kur kanë mbetur edhe pak ditë nga testet parasezonale të MotoGP, piloti spanjoll ka rinovuar kontratën deri në vitin 2022. Ai erdhi në skuadrën japoneze para 4 vitesh dhe ka marrë 6 fitore, është ngjitur 19 herë në podium dhe është nisur 9 herë nga vendi i parë, të cilat i dhanë mundësinë të jetë në vendin e 3-të në Botërorin e 2017-ës dhe atë të 2019-ës.
“Për mua ishte tepër e rëndësishme të jepja këtë lajm, para fillimit të sezonit, – ka thënë Vinjales, – sepse jam shumë i motivuar dhe dua të jem i përqendruar plotësisht për Botërorin e 2020-së. “Jamaha” është si një familje. Objektivi ynë kryesor është si gjithnjë, fitimi i Botërorit dhe ta çojmë “Jamaha”-n në vendin e parë. Do të bëj më të mirën time. Falë besimit të “Jamaha”-s, do të arrijmë të japim maksimumin.” Ndërkohë që edhe drejtori i “Jamaha Motor Racing”, Lin Xharvin, ka thënë fjalët e tij më të mira për pilotin spanjoll.
“E sollëm Maverikun në skuadrën tonë në 2017-ën, duke e ditur që është një talent. Është shumë i motivuar dhe i gatshëm të japë maksimumin. Parashikojmë një të ardhme të shkëlqyer për të dhe “Jamaha”-n. Vendimi i Maverikut për të firmosur edhe dy vite të tjera kontratë me ne, tregon besimin e ndërsjellë që kemi në misionin tonë të përbashkët drejt fitimit të titullit “kampion” në Moto GP”, – tha drejtori i skuadrës japoneze. Por cili do të jetë shoku i Vinjales tek “Jamaha”. Gjithçka mbetet për t’u parë, sidomos përsa i përket vendimit të Rosit.
Kontrata e pilotit italian është në skadim. Por ai do të shikojë njëherë si do të jetë motori i ri “Jamaha” dhe më pas të vendosë. Nëse gjithçka do të shkojë ashtu si dëshiron Rosi, atëherë do të firmosë për një ose dy vite me “Jamaha”-n. Në të kundërt i hapet rruga talentit të ri, Fabio Quartararo, i cili, në një zhvillim të vonshëm të së mërkurës, ka firmosur me skuadrën e “Jamaha”-s zyrtare për sezonin 2021-2022, duke ardhur nga skuadra kliente e “Petronas”-it. Kjo nënkupton tashmë se, sipas të gjitha gjasave, sezonin e ardhshëm, gjithnjë nëse do të vendosë të garojë, 40-vjeçarit do t’i duhet të gjejë një skuadër tjetër.
