ASNN – “Dorna Sports”, kompania që zotëron të drejtat e tij, kërkon të rikthejë në normalitet Moto GP-në. Për këtë, kreu i saj, Karmelo Ezpeleta, dëshiron të bëjë një test të përbashkët me të gjithë pilotët në Herez, në 15 korrik 2020. Por disa skuadra, kanë një problem, pasi pilotët e tyre ende nuk kanë mundur të hipin në motor, dhe të zbresin në pistë, sepse janë të karantinuar në shtëpi, për shkak të virusit korona.
Më shumë se 5 muaj pas përfundimit të testit të Katar 2020, disa pilotë të Moto GP-së kanë mundur të hipin në një motor javën e kaluar pas një periudhe të gjatë të izolimit në shtëpi për shkak të krizës globale të koronavirusit. Por shumë të tjerë ende nuk kanë mundur ta bëjnë këtë. Një kthim në normalitet, të cilin “Dorna Sports” dëshiron ta promovojë duke zhvilluar një provë të përbashkët me të gjithë ekipet në 15 korrik 2020, në Herez, vetëm 4 ditë para Çmimit të Madh të Spanjës.
Një sezon që tashmë ka pësuar 6 shtyrje të garave (Tajlandë, Shtetet e Bashkuara të Amerikës, Argjentina, Franca, Italia dhe Katalonja) dhe 4 anulime (Katar, Gjermani, Holandë dhe Finlandë). Por ky propozim i Karmelo Ezpeletës nuk ka gjetur mbështetje të plotë nga “Dukati”, “Jamaha”, “Honda”, “KTM”-ja dhe “Aprilia”, sepse pilotët e tyre ende nuk kanë bërë asnjë provë me motorët e tyre pas kësaj periudhe të gjatë pushimi.
Midis tyre është edhe Valentino Rosi, i cili nuk ka arritur të debutojë në asfaltin e ri në Mizano, sepse pista italiane që pret Çmimin e Madh të San Marinos çdo vit, ndodhet në rajonin Emilia-Romajës, ndërsa vendbanimi i pilotit në Tavulia, etj. Pavarësisht se është vetëm 20 kilometra larg nga pista, ajo i përket provincës së Pezaros dhe Urbinos. E një lëvizje e lirë midis rajoneve deri më 3 qershor është e ndaluar nga Qeveria Italiane.
Të autorizuar për të lëvizur janë vetëm ata për shkak të një arsye urgjente pune ose shëndetësore.
