ASNN – Drejtuesi japonez: “Nuk mund të zgjidhen 20 probleme njëherësh”. “Jamaha” ende nuk po gjen dot sekretin për të krijuar një motor konkurrues me skuadrat e tjera, edhe për viti 2020. Por Takahiro Sumi, drejtuesi i projektit “Jamaha” në Moto GP, thotë se ata do të donin të ishin më novatorë, por duhet të përqendrohen në natyrën themelore të M1. ““Jamaha” i vitit 2020 nuk është në nivelin e “Hondës” apo “Dukati”-t. Edhe Rosi mendon njësoj si unë për të.”
Ky ishte vlerësimi i bërë nga Maverik Vinjales pas testimit të risive që marka japoneze ka bërë me motorin në testet e Mizanos me synimin për vitin 2020. I pyetur për këto fjalë të ashpra, Takahiro Sumi, drejtuesi i projektit “Jamaha” në Moto GP, pranon se po përdor të gjitha burimet e disponueshme në fabrikën e Iuatas, për të dhënë sezonin e ardhshëm një motor më konkurrues për Maverikun dhe Valentinon që t’i lejojë ata të luftojnë kundër “Hondës”, “Suzuki”-t dhe “Dukati”-t.
Por ai thekson se ata nuk mund t’i zgjidhin 20 probleme menjëherë. “Ne nuk jemi aty ku duam të jemi, – ka deklaruar ai. – Sezoni katastrofik që patëm vitin e kaluar na ka ndihmuar të ndryshojmë mendimin dhe të kthejmë mënyrën si kemi evoluar M1. Le të themi se te “Jamaha” gjërat po ndryshojnë. Unë mendoj se ne tani e kuptojmë pozicionin tonë dhe arsyet që na mbajnë në këtë krizë. Ne jemi duke përdorur të gjitha burimet e “Jamaha”-s për të ndërtuar një motor më konkurrues për vitin e ardhshëm.”
“Problemi është se ne kemi mbetur prapa në drejtim të elektronikës, si dhe me përshtatjen e gomave. Jemi duke u përqendruar në këto zona kritike. Të gjithë po punojnë për t’i zgjidhur këto”, – ka përfunduar drejtuesi i projektit “Jamaha” në Moto GP, Takahiro Sumi.
