ASNN – Veterani italian: “Markez është shumë agresiv, ai kështu sillet me të gjithë rivalët e tij”. Valentino Rossi arriti të marrë 3 pikë në garën e Shpilbergut, pasi përfundoi Çmimin e Madh të Shtajermarku, në vendin e 13-të. Por ai e ka kritikuar mënyrën e pilotimit nga ana e Mark Márkez. Piloti spanjoll ka zemëruar bashkëatdhetarin e tij, Aleiks Espargaró, kur që në xhiron e parë, e ka prekur pilotin e “Aprilia”-s, çka bëri që numri 41 të humbiste disa pozicione.
Me rifillimin e garës, pas flamurit të kuq, të dy pilotët, përsëri u përfshinë në një episod të ngjashëm. E disa xhiro më vonë, Espargaro u detyrua të largohej fare nga gara. Valentino Rosi u pyet se si i shihte të dy incidentet midis pilotit të “Honda”-s dhe atij të “Aprilia”-s. I mbiquajturi “Doktori” nuk donte të hynte në detaje, por ai iu referua mënyrës së drejtimit të motorit nga ana e numrit 93. “E vetmja gjë që mund të them është se Márkezi është shumë agresiv me të gjithë rivalët e tij”, – tha Rosi.
“Këtë radhë ka qenë Aleiksi, herë të tjera kanë qenë pilotë të tjerë, – ka vijuar ai. – Nuk e di çfarë të them, sinqerisht. Nuk e kam idenë sesi kjo situatë mund të përmirësohet.” Ndërsa vetë i ndëshkuari në këtë rast, Aleix Espargaró, ia ka vënë fajin komisarëve të pistës që nuk e ndëshkuan Markezin për të dy rastet. “Unë nuk fajësoj Mark Markezin, sepse ai është i tillë në çdo garë, – ka thënë ai. – Për mua faji është i Panelit të Komisarëve, nuk e di se ku ishin … ndoshta po shikonin ditën e fundit të Lojërave Olimpike.”
“Nuk e di, është e vështirë të kuptohet. Ata duhet të bëjnë diçka, pasi Marku më goditi shumë fort në krah dhe më nxori nga pista herën e parë. E njëjta gjë ndodhi edhe në rastin e dytë. Apo nëse nuk rrëzohet asnjë pilot, atëherë nuk ka ndëshkime?!” – përfundoi piloti i “Aprilia”-s.
