ASNN – Por gjithçka mbetet pezull sa i përket nisjes së sezonit, të shtyrë për shkak të koronavirusit. Epidemia globale e koronavirusit ka prekur edhe Kampionatin Botëror të Motoçiklizmit, me kalendarin e nivelit më të lartë, Moto GP-së, të shtyrë për në prill. Për këtë arsye, disa prej skuadrave të Moto GP-së kanë vendosur të kryejnë një test privat në Herez gjatë marsit. Disa prej skuadrave të Moto GP-së kanë vendosur të kryejnë një test privat në Herez gjatë marsit, në mungesë të garave këtë muaj si rezultat i shpërthimit të koronavirusit.
Gara e hapjes së sezonit të Moto GP-së këtë fundjavë në Katar u anulua për shkak të procedurave të reja të karantinës që u vendosën kundrejt udhëtarëve italianë nga vendi i Gjirit Persik, ndërsa ndalimi nga ana e Tajlandës i tubimeve të mëdha publike, bëri që gara e dytë të shtyhej për në 4 tetor. Tanimë mësohet se KTM-ja ka marrë me qira pistën e Herezit nga data 18, deri më 20 mars 2020, me “Honda”-n dhe “Suzuki”-n që i bashkohen gjithashtu markës austriake. Për shkak të kufizimeve të testimit, si Honda zyrtare, “HRC”, ashtu edhe “Suzuki”, do të duhet ta bëjnë këtë me pilotët e tyre të testeve, Stefan Bradl dhe Silviën Gintoli.
Por KTM-ja, që është një skuadër konçesionare, mund të përdorë listën e saj të plotë të pilotëve. Edhe “Aprilia” supozohej të bashkohej me skuadrat e mësipërme në këtë testim privat, me prodhuesen italiane gjithashtu në gjendje të përdorte pilotët e saj të garave. Sidoqoftë, Italia vendosi rreth 16 milionë qytetarë të saj nga rajone të ndryshme të “zonës së kuqe” në karantinë në orët e para të mëngjesit të së dielës në një përpjekje për të parandaluar përhapjen e koronavirusit, i cili ka infektuar më shumë se 5,800 njerëz dhe shkaktuar 234 viktima.
Baza e “Aprilia”-s në Noale, që gjendet në provincën e Venecias, ndodhet brenda zonës së karantinës, duke bërë që skuadra italiane të mos marrë dot pjesë në testet e Herezit. “Dukati” aktualisht nuk është zonën e karantinës, por nuk e ka përcaktuar Herezin si një nga destinancionet e tij private të testimit për këtë vit. Edhe “Jamaha” nuk do të jetë e pranishme në Jerez, por pritet të zhvillojë një provë në të njëjtat data me pilotët e testimit Horge Lorenco dhe Katsuhuki Nakasuga.
Sipas kalendarit të rishikuar, gara e parë e Moto GP-së do të jetë Çmimi i Madh i Amerikës më 5 prill 2020, megjithëse edhe kjo po duket tani gjithnjë e më e pamundur. Qyteti pritës, Ostini, shpalli gjendjen e jashtëzakonshme për shkak të shpërthimit të COVID-19, ndërsa situata në Itali, që prek personelin e shumtë të skuadrave, përfshirë edhe Valentino Rosin, ka ngritur dyshime të mëtejshme për garën e Teksasit.
