ASNN – “Dukati” ka zgjatur marrëveshjen me Moto GP-në derinë vitin 2026. Prodhuesi italian i motorëve do të qëndrojë në nivelin më të lartë të Kampionatit Botëror të Motoçiklizmit edhe për 5 sezone të tjera. Në sezonin 2021 të Moto GP-së, skuadra zyrtare e “Dukati”-t do të përfaqësohet nga pilotët Miller dhe Banjaja. Skuadra italiane ka nënshkruar një marrëveshje të re me kompaninë organizatore të Moto GP-së, “Dorna Sports”.
Marrëveshja e re mbulon sezonet e Kampionatit Botëror nga 2022-shi në 2026-ën në Moto GP, me prodhuesin italian, që bëhet kështu marka e dytë, që konfirmon planet e saj afatgjata në garat e Çmimeve të Mëdha për motorë. Më herët ishte KTM-ja që rikonfirmoi javën e kaluar qëndrimin e saj në Moto GP deri në 2026. “Dukati” ka qenë gjithnjë i pranishëm në botën e Moto GP-së që nga viti 2003, duke fituar garën e tij të parë pas vetëm 6 Çmimesh të Mëdha me Loris Kapirosin.
Më pas, skuadra italiane do të fitonte tituj botërorë me pilotë e për konstruktorë në vitet në vijim. Vitin e kaluar “Dukati” fitoi Kampionatin Botëror të Konstruktorëve në Moto GP, duke i mohuar këtë Suzukit, e deri më sot ka 51 fitore dhe 160 podiume në nivelin më të lartë. “Gara ka qenë gjithmonë një pjesë vërtet themelore e markës “Dukati” dhe do të mbetet e tillë në të ardhmen”, – tha Drejtori i Përgjithshëm i “Dukati”-t, Klaudio Domenikali.
“Në fakt, ajo përfaqëson jo vetëm një mënyrë për të ushqyer pasionin dhe gëzimin e “dukatistëve” në të gjithë botën, por edhe një laborator të përparuar kërkimor ku testohen materialet më të sofistikuara dhe metodat më inovative të dizajnit, – vijoi ai. – Kjo marrëveshje e rinovuar konfirmon që, ndërsa ne planifikojmë të vazhdojmë të zgjerojmë gamën tonë të produkteve jashtë botës së motorëve sportivë, pista dhe motorët me rezultate të larta mbeten një element qendror për “Dukati”-n.”
Në Botërorin e 2021-shit, “Dukati” ka konfirmuar si pilotët e saj, Xhek Miller dhe Françesko Banjaja, pas largimit të Andrea Doviciozo dhe Danilo Petruçi. “Dukati” do të vazhdojë të mbështesë ekipet kliente,“Pramak”-un dhe “Avintia”-n në 2021-shin. E teksa KTM-ja dhe “Dukati” kanë konfirmuar tashmë të ardhmen e tyre në MotoGP përtej këtij viti, katër prodhuesit e tjerë të motorëve, “Jamaha”, “Suzuki”, “Honda” dhe “Aprilia”, e kanë qëndrimin e tyre në Moto GP të konfirmuar deri në 2022-shin.
