ASNN – Italiani fiton duelin e shkretëtirës me Markezin, gjithçka erdhi direkt në RTSH. Kampionati Botëror i Motoçiklizmit ka ngritur siparin e sezonit të ri me garën e Katarit, që u zhvillua të dielën. Sikundër këto sezonet e fundit, edhe ky sezon i sportit më të shpejtë mbi dy rrota do të sillet për sportdashësit drejtpërdrejt nga Rrjeti i Radio-Televizionit Shqiptar.
Italiani Doviciozo ka triumfuar në një beteje të ethshme me spanjollin Markez në finish, duke marrë kreun e podiumit. Një sezon i ri, por e njëjta adrenalinë dhe i njëjti spektakël i ethshëm nga fillimi deri në fund. Nëse ndokush kishte patur dyshime se çfarë do të ofron sezoni i ri i nivelit më të lartë të Kampionatit Botëror të Motoçiklizmit, që njihet si Moto GP, atëherë gara e parë ka mjaftuar për të dhënë një përgjigje të qartë.
Në atë që ishte një përsëritje e garës së vjetshme, Andrea Doviciozo ka ruajtur gjakftohtësinë mbi motorin e tij “Dukati”, duke i bërë ballë edhe një sulmi të fundit të rivalit të tij kryesor dhe kampionit në fuqi të botës, Mark Markez me “Hondën” zyrtare, duke kaluar i pari vijën e finishit dhe duke marrë kështu kreun e podiumit. Në fakt, gara e zhvilluar në pistën e Losailit në Katar, ka qenë një garë e luftuar fort.
Nga fillimi deri në fund dhe një garë e luftuar ngjeshur madje, pasi ka qenë një grup prej 9 pilotësh që kanë rivalizuar me njëri-tjetrin dhe kreu i betejës ka ndërruar shpesh duar, me Doviciozon, Markezin, por edhe Aleks Rinsin e “Suzukit” që provuan ta drejtonin garën. Më shpesh dhe më gjatë kreun e mbajti piloti i “Dukatit”, i cili bëri një garë të jashtëzakonshme, duke i bërë ballë edhe sulmit të fortë të rivalit të “Hondës”.
Në fund, Andrea Doviciozo i “Dukatit” korri një fitore të madhe në një betejë epike në shkretëtirë midis 5 pilotëve dhe italiani e mundur Mark Markezin e “Repsol Hondës” me vetëm 23 të mijëtat. Podiumin e plotësoi Kal Kraçlou i “Hondës” kliente, i cili la pas Aleks Rinsin e “Suzukit” dhe Valentino Rosin e “Jamahas”, ndërsa vetëm 6 të dhjetat e sekondës i ndanë 5 pilotët e parë nga njëri-tjetri.
