ASNN – Mark Markezi nuk ka ende një datë të saktë rikthimi në pistë. Piloti spanjoll i “Honda”-s, është ende duke e marr veten pas operacionit të 3-të në shpatull. Drejtuesit e markës japoneze, sqarojnë se janë duke punuar shumë që ai të jetë gati për testet e para të sezonit në Sepang. Kanë mbetur edhe 38 ditë nga koha kur do të fillojë Kampionati Botëror i Moto GP-së për vitin 2021.
Me dy ditët e testeve në Sepang, ku fokusi kryesor i vëmendjes, siç ndodhi në vitin 2020, mbetet nëse Mark Márkez do të jetë në gjendje të kthehet mbi motorin “RC213V”. Pas operacionit të tretë në shpatull, e ardhmja e pilotit spanjoll të “Honda”-s, është plotësisht e panjohur. “Për momentin, gjithçka është në diskutim”, – kanë thënë drejtori i skuadrës japoneze, Tetsuhiro Hikita, pasi u pyet për gjendjen fizike të 8 herë kampionit të botës.
“Ne po monitorojmë nga afër gjendjen e tij dhe po punojmë shumë, në mënyrë që ai të jetë në motor për testet e para të sezonit në Sepang, – ka vijuar ai. – Ne do të bëjmë gjithçka që është e mundur për ta ndihmuar atë.” Grupi i 5 mjekëve që ndjek rikuperimin e Markezit, zbuluan pas operacionit të 3-të, një infeksion, për të cilin piloti po trajtohet me antibiotikë.
E nëse kjo nuk do të rezultojë efektive, atëherë do të vonohet rikthimi i Markezit në pistë. Por përveç rikthimit të pilotit, tek “Honda” po punohet shumë për përmirësimin e motorit. Fillimisht janë duke punuar mbi përshtatjen e “Honda”-s me gomat “Michelin”, për të përmirësuar elektronikën, për të rritur fuqinë e motorit përmes marrjes dhe shkarkimit, në mënyrë që të fitohet shpejtësia maksimale, për të përsosur integrimin e shasisë së markës japoneze me gomën e pasme “Michelin”.
