ASNN – Spanjolli mbizotëron nga fillimi deri në fundi në pistën gjermane, gara erdhi drejtpërdrejt në RTSH. Mark Markezi ka mbizotëruar nga fillimi deri në fund në garën e Çmimin e Madh të Gjermanisë në Moto Xhi-Pi, të zhvilluar të dielën. Piloti spanjoll e ka mbyllur garën në pistën e Saksen-ringut ashtu siç e nisi, në vend të parë, duke thelluar kryesimin e renditjes së përgjithshme.
Pasi është detyruar të kënaqet në garën e mëparshme, atë të Asenit në Holandë, me shkallën e dytë të renditjes, Mark Markezi nuk ka vonuar të ngjitet në atë të parë, teksa ka mbizotëruar nga fillimi deri në fund në pistën e Saksenringut dhe duke prekur i shkëputur i pari vijën e finishin në Çmimin e Madh të Gjermanisë në stacionin e radhës në Botërorin e Moto GP-së.
Në fakt, përtej një luhatjeje të vogël në metrat e para, kur u duk se ai e humbi toruan edhe pse u nis nga vendi i parë, spanjolli ishte ai që u fut i pari në kthesën e parë dhe, që nga ai moment, gjithçka tjetër është histori. Në përfundim, teksa pati krijuar një hendek të bollshëm nga ndjekësit më të afërt, piloti i “Repsol Hondës”, u kënaq me një epërsi prej 4.5 sekondash ndaj Maverik Vinjalesit të “Jamahas” zyrtare.
Ky i fundit mori vendin e dytë, pasi triumfoi në betejën me britanikun e “LCR Hondës”, Kal Kraçlou. Ndërkohë, ky ishte triumfi i 10-të në pistën gjermane për Markezin, i cili ka korrur njëkohësisht edhe fitoren e 75-të në të gjitha kategoritë e Moto GP-së dhe i 49-ti për të në nivelin më të lartë të kampionatit më të shpejtë në botë mbi dy rrota. Afro 10 sekonda pas 3-shes së të parëve erdhën dy pilotët e “Dukatit”, Danilo Petruçi e Andrea Doviciozo.
Ndërsa 10-shen e parë e plotësuan Xhek Miller i “Pramakut”, Joan Miri i “Suzukit”, Valentino Rosi i “Jamahas”, Franko Morbideli i “Petronas Jamahas”, dhe Stefan Bradli i “Repsol Hondës”. Sikundër i gjithë ky sezon, edhe gara e së dielës erdhi drejtpërdrejt në Rrjetin e Radio-Televizionit Shqiptar.
