ASNN – Mark Markez nuk njeh kundërshtarë në Ostin. Piloti spanjoll i “Honda”-s fiton për herë të 7-të Çmimin e Madh të Shteteve të Bashkuara të Amerikës, duke treguar se atje nuk ka se kush ta ndalë. Kjo fitore tregon se spanjolli po e merr veten nga dëmtimi dhe shpreh synimet e tij për të fituar gjithçka në sezonin e ardhshëm. Kështu pra, Mark Markezi, “kanibali” i Moto GP, ka mundur të shuajë disi urinë e tij për fitore, me suksesin e arritur në Çmimin e Madh të Amerikës.
Aty ku ai nuk njeh kundërshtarë. Me një nisje dhe garë të përsosur, piloti spanjoll e fiton për herë të 7-të Çmimin e Madh të Amerikës, një pistë tepër e vështirë, me shumë kthesa, por që vetëm ai di ti administrojë si duhet. Dhe me meritë është vlerësuar me notën 10. “Po e kërkoja këtë fitore sidomos në këtë pistë ku ndjehem me të vërtetë mirë, – ka thënë piloti spanjoll, tepër i lumtur për fitoren e arritur në Ostin. – Do të përpiqem të fitoj edhe në tre garat e fundit të këtij Botërori.”
Dhe, pas kësaj gare, Markezi është shumë pranë pozicionimit midis 5 më të mirëve të këtij Botërori në Moto GP. Tashmë të gjithë kundërshtarët janë të paralajmëruar për sezonin e ardhshëm. Mark Markezi po rikthehet për të shkruar një faqe të re, me synimin e tij të përhershëm, fitimin e titullit të “kampionit të botës”. Ndërsa Fabio Kuartararo, duket se po ecën i sigurt drejt fitimit të këtij titulli këtë sezon, teksa Botërori po i afrohet fundit.
Vendi i dytë, i arritur në Ostin të dielën, i ka dhënë më shumë shanse pilotit francez për të pretenduar titullin. Ai ndodhet në kuotën e 254 pikëve në krye të renditjes për pilotë, 52 pikë më shumë se ndjekësi i tij më i afërt, Françesko Banjaja që ka 202 pikë. E kur kanë mbetur edhe 3 gara për t’u zhvilluar, nëse Kuartararo fiton garën e ardhshme dhe lë pas Banjajën, atëherë ai shpallet automatikisht “kampion bote”.
