ASNN – Piloti spanjoll i Hondës, Mark Markez, do të niset i pari edhe në garën e Çmimit të Madh të Amerikës. Koha e arritur prej tij në pistën e Ostin ka qenë më e shpejtë se e dy ndjekësve, Lorenco dhe Rosi. Gara e Çmimit të madh të Amerikës do të nisë në orën 21:00 dhe do të transmetohet drejtpërdrejt dhe ekskluzivisht nga Rrjeti i Radio-Televizionit Shqiptar.
Kështu, Mark Markez do të niset i pari edhe në garën e Çmimit të Madh të Amerikës. Në pistën e Ostin, piloti spanjoll i Hondës ka dhënë kohën 2’03”188, duke qenë më i shpejtë se ndjekësit e tij, Lorenco dhe Rosi. Dy pilotët e “Jamaha”-s nuk kanë mundur të kapin ritmin e Hondës së Markezit. Horge Lorenco ka qenë vetëm 69 të mijëtat më i ngadaltë se Markez.
Ndërsa Rosi, që do të niset nga vendi i tretë, ka qenë 456 të mijëtat më i ngadaltë se i pari. Provat zyrtare të Çmimit të Madh të Amerikës u karakterizuan nga një mot i paqëndrueshëm. Pilotët përdorën gomat e buta “Mishlën”. Pra Markez, Lorenco dhe Rosi do të jetë vija e parë e nisjes në garën e sotme. Ndërsa në vijën e dytë të nisjes do të jenë Janonen me Dukatin, Vinalez me Suzukin dhe Kreçlou me Hondën.
Pas dy garave të para, Mark Markez kryeson Botërorin e Motorëve, me 41 pikë, i ndjekur nga Horge Lorenco, në vendin e dytë, me 33 pikë, dhe, në të tretin, Dani Pedroza, me 27 pikë. Gara për Çmimin e Madh të Amerikës, do të zhvillohet sot në orën 21:00 dhe do të transmetohet drejtpërdrejt dhe ekskluzivisht nga Rrjeti i Radio-Televizionit Shqiptar.
