ASNN – Spanjolli: “Ishte gabimi im dhe i kërkoj falje Horhe Martinit”. Mark Markez ka pranuar fajin për rrëzimin e Horhe Martinit që në xhiron e parë të garës së Çmimit të Madh të Britanisë së Madhe në Moto GP. Ndërsa piloti i “Pramak Dukati”-t ishte në kthesën numër 9 të pistës në Silverstoun, Markezi mundohet ta parakalojë nga pjesa e brendshme e pistës, por rrëzohet, duke i nxjerrë të dy pilotët nga gara.
“Unë dua t’i kërkoj falje Martin sepse ishte plotësisht faji im”, – tha Markezi. Unë isha shumë optimist për atë parakalim. Ishte një situatë e çuditshme sepse Kuartararo dhe Martin shkuan shumë gjerë në kthesë dhe unë prisja që ky i fundit të ishte më jashtë kthesës. Dhe ajo që bëra ishte thjesht përgatitja e këndit dhe, nuk kisha kohë të ndryshoja shpejtësinë.”
“Kjo, pasi isha me marshin e 3-të dhe kështu llogaritja nuk ishte ajo e sakta, prandaj ishte plotësisht gabimi im”, – përfundoi ai. Nga ana e tij, Horhe Martin e pranoi faljen e Mark Markezit, por ai është ende “i zhgënjyer”, pasi gara e tij u “shkatërrua” nga piloti i “Honda”-s, pasi mendonte se mund të luftonte për fitore. “Siç shihet nga imazhet unë nuk kisha faj”, – ka thënë ai.
“Jam tepër i zhgënjyer sepse ndjehesha super i fortë, gjithnjë duke parë ritmin mund të kisha luftuar për vendin e dytë ose ndoshta për fitoren, – ka vijuar piloti i skuadrës kliente të “Dukati”-t. – Marku erdhi për të më kërkuar falje, kjo është një gjë e mirë nga ana e tij, por ai shkatërroi garën time. Dhe ky është problemi kryesor. Ai nuk e kontrolloi manovrën në mënyrën e duhur, nuk kishte hapësirë.”
“Shpresoj që ai të mësojë nga ky rast për të ardhmen”, – shtoi Horhe Martin, i cili sidoqoftë refuzoi të komentojë nëse Mark Markezi meriton një dënim për këtë gjë që bëri në Silverstoun, por shpreson që drejtuesit e garë të bëjë punën e tyre.
