ASNN – Do të jetë Horge Lorenco i “Jamahas” ai që do të niset të dielën i pari në Garën e Çmimit të Madh të Francës në Moto Xhi-Pi. Lorenco, i cili niset kështu për të parën herë i pari në Lë Mansh, la prapa Mark Markezin dhe Janonen. Të gjitha emocionet e Kampionatit Botëror të Motoçiklizmit po sillen për sportdashësit drejtpërdrejt nga Rrjeti i Radio-Televizionit Shqiptar, që do të sjellë të dielën, duke nisur nga ora 14:00, edhe garën e Francës.
Niveli më i lartë i Kampionatit Botëror të Motoçiklizmit, që njihet si Moto GP, ka zhvilluar të shtunën pasdreke provat zyrtare të garës së tij të 5-të të këtij sezoni dhe do të jetë Horge Lorenco i “Jahamas” ai që do të niset të dielën i pari në Garën e Çmimit të Madh të Francës. Në fakt, gjatë gjithë qëndrimit të tij në pistën e Lë Manshit, Lorenco nuk doli jashtë dyshes së parë, sa i përket kohëve më të shpejta, por në provat zyrtare e theu rekordin e deritanishëm, duke i përshkuar 4.2 kilometrat me kohën 1 minutë, 31 sekonda dhe 975 të mijtat.
Lorenco, i cili niset kështu për të parën herë i pari në Lë Mansh, la prapa Mark Markezin dhe Janonen. Për Markezin e “Honda”, kjo është hera e 5-të në po aq gara të këtij sezoni, që do të niset në 3-shen e të parëve, ndërsa për Andrea Janone i “Dukatit” kapërceu edhe një rrëzim gjatë provave, duke regjistruar kohën 1 minutë, 32 sekonda e 469 të mijtat. Në rreshtin e dytë, Pol Espargaro niset nga vendi i 4-t, i shoqëruar nga Andrea Doviciozo dhe Bredli Smith.
Fituesi i garës së mëparshme, asaj të Spanjës, Valentino Rosi, do të niset i pari në rreshtin e 3-të, pozicioni i tij më i keq që nga ai vend i fundit në Valencia dhe hera e parë që nga viti 2015 në Australi që niset nga ky pozicion. Të gjitha emocionet e Kampionatit Botëror të Motoçiklizmit po sillen për sportdashësit drejtpërdrejt nga Rrjeti i Radio-Televizionit Shqiptar.
