ASNN – Spanjolli do të garojë edhe në Çmimin e Madh të San Marinos. Rikthimi në garë i Dani Pedrozës pas 3 vitesh, i ka emocionuar të gjithë apasionuarit pas Moto GP-së. Një rikthim sa emocionues aq edhe i frikshëm, pas atij aksidenti në të cilin u përfshi spanjolli në xhirot e para të Çmimit të Madh të garës së parë në Austri.
Zgjati vetëm pak kilometra gara për Pedrozën por ai do të rikthehet sërish në Çmimin e Madh të San Marinos, që do të zhvillohet në Rivierën e Riminit në fundjavën 17-19 shtatorit 2021, në të cilën do të marrë pjesë me KTM-në e tij eksperimentale.
Sigurisht që ky vendim nuk ishte një tekë e pilotit, por një dëshirë e firmës austriake. Skuadra e KTM-së ka bërë ndryshime të mëdha në motor, të cilat duhen provuar në garë, për t’u vlerësuar nëse janë bërë mirë apo keq. “KTM RC16” po përmirësohet shumë dhe rezultatet e mira në dy sezonet e fundit e tregojnë këtë.
Tani mungon vetëm shtytja e fundit për të qenë midis më të mirëve, por duket se puna e madhe që ka bërë skuadra austriake dhe piloti-kolaudator me numrin “26”, po sjellin fryte.
