ASNN – Kal Kraçlou ka pritur 98 gara për të gjetur fitoren e tij të parë në nivelin më të lartë të Kampionatit Botëror të Motoçiklizmit, të njohur si Moto GP, teksa ka triumfuar në Çmimin e Madh të Bërnos në Republikën Çeke. Britaniku ka mbërritur i pari në finish, por spektaklin e kësaj gare, që sikundër i gjithi sezoni i Moto GP, u soll për sportdashësit drejtpërdrejt nga Rrjeti i Radio-Televizionit Shqiptar, e ka dhuruar i përhershmi Valentino Rosi.
Viti 2016, ose më saktë, muaji gusht, padyshim është një periudhë për të mos u harruar nga britaniku Kal Kraçlou, pasi 30-vjeçari, i cili u bë edhe baba në ditët e para të këtij muaji, ka arritur të dielën fitoren e parë në karrierën e tij në nivelin më të lartë të Kampionatit Botëror të Motoçiklizmit, të njohur si Moto GP, teksa ka triumfuar në Çmimin e Madh të Bërnos në Republikën Çeke. Britaniku ka mbërritur i pari në finish, por spektaklin e kësaj gare, që sikundër i gjithi sezoni i Moto GP, u soll për sportdashësit drejtpërdrejt nga Rrjeti i Radio-Televizionit Shqiptar, e ka dhuruar i përhershmi Valentino Rosi. Italiani u nis i dyti në këtë garë, por një fillim i rrëmujshëm në një pistë të lagur, ka bërë që ai të zbresë në vendin e 12-të. Megjithatë, 37-vjeçari ka nisur një vallëzim mbresëlënës në gjysmën e dytë të garës, duke i parakaluar me radhë të 10 pilotët para tij dhe, vetëm largësia e madhe e krijuar nga kryesuesi i garës, Kraçlou, i ka mohuar italianit kreun e podiumit. Duhet theksuar se fitorja e Kraçlout ishte historike edhe për shkak se ishte e para e një piloti britanik në 35 vitet e fundit, si edhe e dyta e këtij sezoni nga një skuadër e paravarur si “LCR Honda”. Podiumin e garës çeke e plotësoi Mark Markezi, i cili mban kreun e renditjes së përgjithshme me 197 pikë, ndërsa Rosi, që është ngjitur në kuotën e 144 pikëve, ka lënë prapa shokun e tij të skuadrës, Horhe Lorencon, që ka 138 pikë.
