ASNN – Horhe Lorenco nuk ka dhënë 100% te “Honda”. Piloti spanjoll tregon se pas rrëzimeve dhe dëmtimeve të shumta fizike nuk ka mundur të jetë më konkurrues. Gjithashtu ai thekson edhe sekretin e motorit “Honda”, me të cilin vetëm Mark Markezi është përshtatur. Duke u nisur nga mungesa e tij e konkurrencës, Horhe Lorenco shpjegon se ai tani ka filluar të njihet me atë çka ndodh në pjesën e pasme të motorit të tij, kur hyn në kthesa. Pra motori “RC213V” i ri, posedon një fuqi shtesë, që e bën motorin më të shpejtë në kthesa.

“Kur provova për herë të parë motorin e mëparshëm, atë të vitit 2018, e kontrollova shumë mirë, por sapo provova motorin e ri kuptova që kishte një motor shumë të fuqishëm, por kishte diçka që nuk ishte në rregull në kthesa, – ka thënë Lorenco. – Márkezi është disi në gjendje të menaxhojë dhe të përfitojë nga kjo fuqi shtesë, por pjesa tjetër e pilotëve të “Hondës”, për shembull Kal Kratçlou ose unë, vuajnë shumë më tepër sesa me motorin e mëparshëm, kjo është arsyeja pse ne kemi probleme të jemi konkurrues.”

“Marku po fiton me këtë motor. Honda duhet të ndjekë shoferin që po fiton, është gjëja më logjike, dhe pjesa tjetër e pilotëve duhet të ndjekin këtë drejtim për të hipur në motor. Por kjo nuk është më e mira për mua”, – pohon 3 herë kampioni i botës në Moto GP. Kur mbeten edhe 5 gara deri në përfundim të këtij Botërorit të Moto GP-së, spanjolli thekson se nuk pret të luftojë në këto gara për fitore. “Nuk pres që të luftoj për fitore apo podiume, por nëse mund të përmirësoj renditjen time dhe të zvogëloj distancën me fituesin e garës, do të jem i kënaqur”, – ka thënë Lorenco.

Piloti spanjoll shpjegon edhe pse nuk është 100% me “Hondën”. “Nëse nuk do të isha rrëzuar në Asen do të isha shumë më mirë, – thotë ai. – Duhet shumë kohë, të paktën 3 muaj të marrësh veten nga rrëzimi. Duhet të fillosh nga e para në të gjitha fushat, fizikisht, por edhe si t’i japësh motorit sërish mirë. Kam pasur shumë dëmtime e m’u deshën më shumë se 2 muaj për t’u rikthyer në gara. Unë kurrë nuk kam qenë 100% te “Honda”, para rënies në Asen mbase ishte 90%. Por pa shumë besim te motori dhe me probleme fizike është shumë e vështirë të jesh konkurrues në nivelin që ka tani Moto GP-ja.”