ASNN – Italiani i “Dukati”-t pohon se nuk mund të shpresohet vetëm tek rrëzimi i Markezit. Kampioni në fuqi i botës në Moto GP, Mark Markezi,e ka dominuar fillimin e këtij sezoni dhe kjo ka bërë që tek rivalët të bien kambanat e alarmit. Është Andrea Doviciozo ai që ka paralajmëruar se sfidën e tij dhe e “Dukati”-t për titullin e këtij viti, nuk mund të mbështetet thjesht në “lutje” për gabime nga ana e spanjolli.
Andrea Doviciozo ka paralajmëruar se sfidën e tij dhe e “Dukati”-t për titullin e këtij viti në Moto GP nuk mund të mbështetet thjesht në “lutje” për gabime nga ana e Mark Markezit. Doviciozo e fitoi premierën e sezonit në Katar, por nuk ka qenë në gjendje të konkurrojë me pilotën e “Hondës” në 4 garat që vijuan, me kampionin në fuqi që ka marrë një treshe fitoresh dominuese.
Të cilat mund të ishin 4, nëse ai nuk do të rrëzohej teksa kryesonte bindshëm në pistën amerikane të Ostinit në Teksas, çka ka bërë që epërsia e Markezit në krye të renditjes së përgjithshme të pilotëve tani të jetë vetëm 8 pikë kundrejt Doviciozos, i cili sidoqoftë e ka përfunduar çdo garë të këtyre katër të parave. Dy garat e ardhshme në kalendar do të jenë Muxhelo dhe Barcelona.
Dy pista të cilat flasin bindshëm për “Dukati”-n dhe janë ndër më të dobëtat për Markezin. Por Doviciozo tha se edhe fitimi në këto dy pista nuk do të jetë e mjaftueshme kundër Markezit dhe se ai dhe skuadra e tij duhet të gjejnë një mënyrë për të qëndruar pranë spanjollit në garën për titull, edhe atëherë kur piloti i “Hondës” nuk rrëzohet.
“Muxhelo dhe Barcelona do të jenë shumë të rëndësishme sepse mund të jenë pista të mira për ne, por nuk është kjo çështja, – ka deklaruar Doviciozo. – Unë nuk mendoj se ato do të vendosin kampionatin. Ka ende shumë pikë në luftë dhe ne duhet të gjejmë diçka. Nëse jemi në gjendje për të përmirësuar pak, ne kemi shanse për të luftuar. Nëse nuk kemi shanse, thjesht na mbetet lutemi që piloti tjetër të bëjë një gabim.”
“Por kjo nuk është aspak mënyra e duhur për të fituar kampionatin”, – tha italiani, i cili, më tej theksoi se “sigurisht që ne do të jemi konkurrues në Muxhello dhe do të shkojmë atje me 3 rezultate të mira nga “Dukati”, që mori vendet 2-3-4 në La Mansh, çka është vërtet pozitive, por ne duhet të gjejmë diçka”. Kur u pyetën se ku duhej të përmirësohej ai dhe “Dukati Dezmosediçi”, Doviciozo nuk hyri në hollësi.
“Ne kemi nevojë për shpejtësi, – tha italiani. – Kur ke shpejtësi, je në gjendje të administrosh shumë gjëra. Kur jeni edhe vetëm dy të 10-tat më ngadalë, gjithçka bëhet problem”, – përfundoi Andrea Doviciozo.
