ASNN – Grupi A1 i Kampionatit Kombëtar të Volejbollit për Femra, dhuroi sot emocione të forta dhe surpriza të shumta në javën e 6-të të tij, pasi në duelin midis dy kryesueseve, Tiranës dhe Mirditës, pati “rrokadë” dhe skuadra nga Rrësheni merr për herë të parë këtë sezon kryesimin e garës. Ishin mirditoret që shkëlqyen në këtë ndeshje, duke fituar me rezultatin 3-1 dhe duke i rrëmbyer kreun Tiranës.

Ndeshja e luajtur në kryeqytet pati emocione, rivalitet dhe në mjaft momente pasiguri për skuadrat në objektivin e tyre, pasi konkurrenca për çdo pikë ishte mjaft e fortë. Setin e parë e fitoi Mirdita me shifrat 25-16, duke e befasuar Tiranën që kishte krijuar vetëbesim në këtë edicion. Seti i dytë ishte njëherësh edhe më i forti, edhe më i rivalizuari.

Fitoi Mirdita me shifrat 26-24, duke i dhënë vetes një impuls të fortë për të pretenduar fitoren. Por Tirana nuk u dorëzua. Vajzat bardheblu të trajnerit Ardian Gorenxa fituan setin e tretë me shifrat 25-22 dhe tentuan ta përmbysnin ndeshjen. Por atëherë kur pritej shpërthimi i Tiranës ndodhi e kundërta, shkëlqejnë vajzat nga Mirdita që fitojnë setin e katërt me shifrat 25-21.

Bashkë me të edhe krejt ndeshjen 3-1, duke bërë që të marrin edhe kreun e renditjes, duke zbritur Tiraën në vendin e dytë. Ndërkohë, në ndeshjet e tjera të Grupit A1, Barleti Volej mundi 3-0 Skënderbeun, me sete 25-6, 25-15 dhe 25-18, duke mos e vënë në asnjë moment në diskutim fitoren. Partizani mposhti Lushnjën 3-0, në një duel relativisht të lehtë dhe ku vajzat e skuadrës së kuqe bëjnë përparim në renditje.

Por ato mbeten dukshëm larg treshes së kreut. Po sot, Vllaznia mundi Teutën me rezultatin 3-1, duke iu larguar disi vendeve të fundit, por jo mjaftueshëm që të ngjitet në grupin e pretendentëve.

Kampionati Kombëtar

i Volejbollit – Femra

Grupi A1

Java e 6-të

E shtunë, 10 nëntor 2018:

Partizani – Lushnja             3-0

(25-13, 25-17, 25-18)

Vllaznia – Teuta                    3-1

(25-15, 23-25, 25-17, 25-15)

Barleti Volej – Skënderbeu 3-0

(25-6, 25-15, 25-18)

Mirdita – Tirana                     3-1

(25-16, 26-24, 22-25, 25-21)

Renditja:

Nr.       Skuadra         N.        F.         H.        Pikë

1. Mirdita            6          5          1          16
2. Tirana             6          5          1          15
3. Barleti Volej   6          5          1          15
4. Partizani        6          4          2          11
5. Teuta              6          2          4            6
6. Vllaznia         6          2          4            5
7. Skënderbeu 6          1          5            3
8. Lushnja         6          0          6            1