ASNN – Drita e Gjilanit shënoi 4 fitore në po aq ndeshje të zhvilluara gjatë përgatitjeve të këtij muaji në Antalja të Turqisë. Me rezultate kryesisht pozitive, përgatitjet në bregdetin turk i mbyllën edhe 7 skuadrat e tjera të elitës së futbollit kosovar. Dhe kundërshtarët ishin të nivelit goxha serioz. Paraqitjet dhe rezultatet e arritura përballë skuadrave të shteteve të ndryshme evropiane, sipas trajnerit të futbollit Gani Sejdiu, janë sinjal se ka ngritje të cilësisë së ekipeve kosovare. Sejdiu thotë se nuk janë të rastësishme fitoret e arritura të disa klubeve të Kosovës përballë klubeve të njohura të vendeve evropiane.
“Jam shumë i kënaqur me prezantimin dhe fazën përgatitore që po e bëjnë në Antalia të Turqisë, – ka thënë Sejdiu të dielën për KOHËN. – Edhe pse ndeshjet miqësore nuk janë përcaktuese për nivel, megjithatë në një përqindje të lartë janë tregues ku i kemi ekipet. Po bëjnë ndeshje të mira, kanë rezultate të mira kundër ekipeve të Ukrainës dhe shteteve tjera, që në të kaluarën kanë qenë shumë larg ekipeve tona. Tanimë, në bazë të paraqitjeve, është pothuajse i njëjti nivel. Është tregues se niveli është profesional, si në aspektin e lojës, lojtarëve, organizimit dhe rezultateve.”
“Gjitha ekipet janë të plotësuara, – ka vijuar ai. – Kanë staf të kompletuar dhe tregon se futbolli, apo klubet e Kosovës, kanë ngritje të madhe. Rezultatet nuk janë të rastësishme, por reflektim i punës së madhe që është bërë. Për ta rritur edhe më shumë imazhin, duhet rregulluar në Kosovë edhe infrastruktura.” Klubet e Kosovës ka 6 apo 7 vjet që zhvillojnë përgatitje në Antalia. Rritjen e klubeve, si për nga organizimi ashtu edhe sa u takon rezultateve, e sheh edhe Amir Prepolli, që organizon qëndrimin e skuadrave kosovare në bregdetin turk. “Dallimi është shumë i madh duke nisur nga organizimi, puna dhe rezultatet”, – thotë ai.
“Nëse para 5 vjetësh ka pasur vështirësi të natyrave të ndryshme, sot klubet e Kosovës janë kthyer në klube shumë të organizuara dhe në të gjitha aspektet nuk kanë dallim kundrejt klubeve të ndryshme që zgjedhin Antalian për t’u përgatitur”, – ka theksuar më tej Prepolli. Në këto miqësore, Drita mposhti skuadrën e Kategorisë së Dytë të Hungarisë, Vashashin, me rezultatin 6-1, mundi 3-1 skuadrën ukrainase, Çërnomoretsin e Odesës, dhe po ashtu ekipin nga Polonia, Legia e Gdanjskut, me rezultatin 2:1. Po kështu, skuadra gjilanase fitoi 1-0 ndaj skuadrës së Ruh Horzovit, që militon në elitën e futbollit të Polonisë.
“Është mirë që kryesitë e klubeve tani e dinë se sa e vlefshme është që skuadra të bëjë përgatitje dimërore në Antalia, – ka thënë trajneri i Dritës, Zekirija Ramadani. – Para disa vitesh cilësia ishte më e vogël tek ekipet kosovar dhe ishte vështirë të bësh ndeshje të forta kontrolluese, sepse shumë ekipe nuk donin të luanin me ekipet kosovare. Tani është rritur shumë kualiteti në ekipet tona dhe kemi mundësi edhe të zgjedhim kundërshtarët e jo të luajmë kundër çfarëdo ekipi. Ekipet kosovare tani ndihen të barabarta me çdo ekip që luan në fazën përgatitore në Antalia.”
Ndërkaq, kampionia e Kosovës, Ballkani, e mbylli fazën përgatitore në Antalia me fitore ndaj skuadrës së njohur ukrainase, Dinamo e Kievit. Ballkani mposhti me rezultatin 2- Dinamon, që është klubi me më shumë trofe të fituar në Ukrainë. Ballkani fitoi edhe ndaj skuadrës elitare të Polonisë, Jagiellonias, me rezultatin 2-1, ndërsa barazoi pa gola ndaj skuadrës elitare të Uzbekistanit, Termez Surkhon. Llapi mposhti skuadrën e njohur nga Ukraina, Vorsklën e Poltavës me rezultatin 2-0, por kjo ishte fitorja e vetme e Llapit, teksa i humbi ndeshjet e tjera.
Llapjanët u mundën nga Nasafi i Uzbekistanit me rezultatin 1-2, nga Keshkemeti hungarez, 0-2, dhe 0-1 nga skuadra tjetër hungareze, Szegedi. Malisheva ka fituar 2-0 ndaj skuadrës ukrainase, Oboloni i Kievit, ndërsa me ekipin elitar të Uzbekistanit, Sogdiana Jazakh, u nda në barazim 1-1. Prishtina fitoi 1-0 kundër kampiones së Kazakistanit, Ordabasit, ndërsa humbi 0-1 përballë kampiones së Sllovakisë, Ruzhomberokut, ashtu siç u mund 1-3 nga Celje, ekip që kryeson renditjen në Slloveni. Dukagjini ka fituar 2-1 kundër Levskit të Sofies së Bullgarisë, ka barazuar pa gola me Kyzylzharin e Kazakistanit, ndërsa u mund 1-4 nga Obolon Kiev.
Feronikeli 74 barazoi pa gola kundër skuadrës elitare të Hungarisë, Kishvardasë, kurse e mposhti 3-2 ekipin nga Luksemburgu, Mariska Mersh. Gjilani fitoi 1-0 ndaj ekipi kazak, Kyzylzhar. Ekipi i drejtuar nga Genjtan Mezani ka humbur 1-2 përballë Livingstonit, që militon në elitën e futbollit të Skocisë, por edhe 0-1 nga skuadra e kategorisë së dytë hungareze, FC Csakvar. Kujtojmë këtur se pikërisht në Antalia të Turqisë u zhvillua edhe Superkupa e Kosovës. Ishte Prishtina që e fitoi Superkupën duke mposhtur Ballkanin me rezultatin 2-1.
