ASNN – Italianët ndalen në një barazim nga Crvena Zvezda e mbetur me 10 lojtarë. Milani nuk ka shkuar dot më larg se një barazim 2-2 në Beograd përballë Cërvena Zvezdës, në takimin e parë të çiftit të tyre, të vlefshëm për turin e 32-shes së Ligës së Evropës. Kjo ndeshje u soll drejtpërdrejt në RTSH 1, ndërsa në kanalin RTSH Sport kanë ardhur drejtpërdrejt, në një maratonë thuajse 4-orëshe, të gjithë golat e të 16 takimeve të mbrëmjes.
Veprimtaria e dytë e klubeve të kontinentit, Liga e Evropës, është rikthyer të enjten me ndeshjet e para të 16 çifteve të turit të 32-shes, që, ndryshe nga sezonin e shkuar, do të zhvillohen me sistem vajtje-ardhje. Si çdo të enjte evropiane, Rrjeti i Radio-Televizionit Shqiptar ka sjellë drejtpërdrejt në kanalin RTSH 1 ndeshjen më të spikatur të mbrëmjes, atë midis Cërvena Zvezdës dhe Milanit, ndërsa në kanalin RTSH Sport kanë ardhur drejtpërdrejt, në një maratonë thuajse 4-orëshe, të gjithë golat e të 16 takimeve të mbrëmjes.
Takimi i zhvilluar në Beograd ka parë t’i anulohen dy gola në 10 minutat e para Milanit, falë Sistemit të Ndihmësgjyqtarit të Videos (VAR), por skuadra italiane e ka gjetur golin 3 minuta para fundit të kohës së rregullt, falë një devijimi të futbollistit vendas, Pavkov. Me epërsinë minimale të miqve është mbyllur pjesa e parë, por me fillimin e të dytës, miqtë barazojnë shifrat, falë një 11-metërshi të saktë të Kangasë. Por Teo Hernandez rikthen Milanin në epërsi në minutën e 71-të, me një 11-metërsh të saktë në krahun tjetër.
Detyra e Milanit u duk se u bë më e thjeshtë 13 minuta para fundit, kur Rodiç mori kartonin e dytë të verdhë dhe doli nga loja me karton të kuq, duke e lënë skuadrën serbe me 10 lojtarë. Por, pikërisht në minutat shtesë, është Pavkov që korrigjon veten për autogolin dhe 11-metërshin e shkaktuar, që shënon dhe i jep një barazim 2-2 Cervena Zvezdës përballë Milanit.
